Parliament ya Uganda ey’omulundi ogwe 11, egenda kuddamu okutuula okukubaganya ebirowoozo n’okuyisa ennambika y’embalirira y’eggwanga ey’omwaka gw’ebyensimbi 2026/2027 emanyiddwanga Budget flame work paper
Budget framework paper kyekiwandiiko ekitongole, government kyesinziirako okuwa ekifanaanyi ng’embalirira y’eggwanga bwenafanaana,era nga kisindikibwa eri parliament mu December wabuli mwaka.
Obukiiko bwa parliament bwetegereza emiwendo n’entemaatema y’ensimbi government zeebeera etadde mu mirimu egyenjawulo.
Enteebereza y’embalirira eno ey’omwaka gw’ebyensimbi 2026/2027, eweza trillion 69 n’obuwumbi 399, ng’ekendeddeko okuva ku trillion 72 n’obuwumbi 376 ez’omwaka 2025/2026.
Alipoota z’obukiiko bwa parliament olwenjawulo eziva mu kwetegereza embalirira eno ekyaali mu bubage, zigenda kwanjulibwa eri parliament eyawamu okukubaganyizibwako ebirowoozo.
Wabula waliwo obutakwatagana wakati w’embalirira eno ekyali mu bubage neenteekateeka y’eggwanga Nnamutayiika, emanyiddwanga National development plan, government kwetambuliza eggwanga.
Okugeza Ebyentambula n’enguudo, National Development plan 4 byeragira okusaamu trillion 13 n’obuwumbi 644, government yabitaddemu trillion 6 nobuwumbi 575 zokka.
Obukulembeze n’ebyokwerinda National Development Plan byeragira okusibwamu trillion 10 nobuwumbi 991, government yabitaddemu trillion 9 nobuwumbi 24.
Ebyobulimi nokugatta omutindo ku birimibwa, National development plam eragira okubisaamu ensimbi trillion 5 nobuwumbi 368 , byassiddwako trillion 1 n’obuwumbi 470.
Amakolero go National Development plan eragira okugasaamu ensimbi trillion 1 n’obuwumbi 257 mu mwaka gw’ebyensimbi oguggya 2026/2027, wabula government yagataddemu obuwumbi 253, n’ebirala bingi.
