Parliament ekaanyiiza ne government, eggyewo omusolo gwa ‘Pay as you Earn’ (PAYE) ku bakozi abafuna omusaala oguli wansi wa shs 335,000 buli mwezi.
Mu tteeka lya Income tax eribaddewo, abakozi abasasulwa omusaala ogusukka shs 235,000 babadde basalibwako omusolo gwa Pay as you Earn gwa bitundu 10%.
Mu nnoongosereza empya parliament zeeyisizza mu musolo guno ogwa income tax, ogugenda okugibwako omusolo gwa PAYE gwegwo ogusukka 335,000 okudda waggulu buli mwezi.
Gwo omusolo gw’abakozi abafuna omusaala ogusukka mu million 10 n’okweyongerayo waggulu gusigaddeyo ku bitundu 40% ku mutemwa gw’omusaala gwebafuba.
Minister omubeezi ow’ebyensimbi Henry Musaasizi abuulidde parliament nti government okwongeza omusaala ogusookerwako ogulina okugibwako omusolo gwa PAYE, kivudde ku bbeeyi y’ebintu eyekannamye okuva mu mwaka 2012 lwegwagerekebwa.
Omusolo ogubadde gussiddwa ku business ezitakola magoba n’abatunda ku bintu byabwe ebitali bya business bagugaanye;
Parliament yeemu eremesezzza omusolo government gwebadde ayagala okuteeka ku businesses ezitakola magoba okumala emyaka 7 egyomuddiriηηanywa.
Government mu nnongosereza zino, yali eyanjudde omusolo gwa bitundu 0.5% eri kampuni zino,government zerumiriza okwekweka mu butakola magoba okumala emyaka 7 egyomuddiriηanwa.
Ababaka ku njuuyi zombi okuli olwa government n’oluvuganya government, okubadde Kareem Masaaba atalina kibiina ,Nathan Nandala mafabi owa FDC ,Jonathan Odur owa UPC saako Dickson Kateshumbwa owa NRM n’abalala bagugaanye, nga bagamba nti kyabutaliimu ate government okusolooza omusolo ku kampuni ezitalola magoba.
Bawadde government amagezi ekukwatirako kampuni zino zivuunuke okusoomozebwa, zitandiike okukola amagoba olwo ezisolooze omusolo.
Parliament mu mbeera yeemu esuuzizza government ekiteeso eky’okusolooza omusolo ku nsimbi abantu abatunda ku by’obugagga byabwe ebitali bya business, okugeza ettaka, ebintu byomunju n’ebirala ebinanyiddwanga non business assets.
Ababaka bano era bakinogaanyizza nti okubinika omusolo ku bintu bino ebigwa mu ttuluba lya non business assets okugeza Entebbe zomunju, TV, Fridge nebirala saako omuntu atunze ettaka lye nga tali mu business yakutunda ttaka, kibeera kikyamu kubanga ne government yennyini terina busobozi okulingiriza buli omu atunze ekintu kye,okumusoloozako omusolo.
Minister omubeezi ow’ebyensimbi Henry Musaasizi akkaanyizza nebirowoozo by’ababaka omusolo guno nagugyamu enta.
Omusolo ku bayimbi ne Bannakatemba;
Bbo abayimbi,bannakatemba nabalala abasanyusa abantu ,bateereddwako omusolo gwa bitundu 6% ku nsimbi buli omu zanaasasulwanga.
Kampuni ya Bujagaali power limited ekola amasanyalaze n’okugaguza government esonyiyiddwa omusolo okumala emyaka 6 okutuuka mu mwaka gwa 2032
Mu mbeera eno, mu myaka 6 government egenda kufiirwa omusolo gwa buwumbi 690 okusinziira ku alipoota ebadde ewakanya eky’okusonyiwa kampuni ya Bujagaali Power ltd omusolo, ng’ekoleddwa omubaka wa Mbale East division Kareem Masaaba.#
