Oludda oluvuganya government mu parliament luliko enkyukakyuka zerwabadde zaagala zikolebwe mu mbalirira y’eggwanga 2023/2024 , ensimbi zive ku bintu ebimu byebayise ebyokwejalabya zigende ku bintu ebigazisa awamu bannansi.
Wabula okusaba kwabwe tekwateereddwa mu nkola, mu mbalirira yéggwanga eya trillion 52 nóbuwumbi 740 parliament gyeyayisizza.
Embalirira yayise tewali nkyuukakyuuka yonna ekoleddwa okuva ku muwendo agyalabikidde mu alipoota y’akakiiko ka parliament akavunanyizibwa ku mbalirira y’eggwanga.
Oludda oluvuganya government lwabadde lwagala ensimbi obuwumbi 100 ezaabadde zisaliddwa ku kitongole ekisaasaanya ky’amasanyalaze ki Rural electrification Agency, nti zissibwe kukugula tractor ezirima.
Lwabadde era lwagala ensimbi eziweebwa amaka g’obwa President obuwumbi 454 zisalibwe asigaze obuwumbi 12 bwokka ,nti ensimbi endala ziteekebwe mu byobulamu okusinziira ku kusaba okwayanjuddwa omubaka Ibrahim Ssemujju Nganda.
![](https://cbsfm.ug/wp-content/uploads/2023/05/20230518_195457-300x192.jpg)
Akulira oludda oluvuganya government Owek Mathias Mpuuga Nsamba alabudde nti okusinziira kubiteereddwa mu mbalirira, embalirira eno ey’omwaka 2023/2024 tegenda kuyamba nnyo kusitula mbeera zabannansi.
Owek Mathias Mpuuga Nsamba awabudde babaka banne ba NRM, nti baggya kusanga akaseera akazibu okunyonyola abalonzi ku by’ensimbi ezigenda mu maka gobwa Preident, nti nnyingi okusinga ezigenda mukulwaanyisa obwavu nokutuusa obuwereza eri abantu.
Abawadde amagezi nti omulundi oguddako, bafune obuvumu okusimbira ensimbi ezo ekkuuli.
Omumyuka owokusatu owa ssabaminsita w’eggwanga Hajjat Rukia Nakadama yebaziza oludda oluvuganya government olw’ebirowoozo byabwe byebawa mu mbalirira eno,nti wadde tebirina kyebyakyusizza mu mbalirira naye biyambe government okubaako byetereeza.#