Okuyiwa omusaayi, abesimbyewo n’abalonzi okweyogerera ebisongovu, abantu obutajjumbira kulonda, waliwo abasangiddwa neby’okulwanyisa omuli emmundu, emiggo ne bbomu, ebikozesebwa mu kulonda okutuusibwa ekikeerezi, okutiisatiisa abalonzi, n’amannya g’abamu obutalabikira ku alijesita n’ebirala bye bimu ku binokoddwayo abalonzi, nti byefuze akalulu k’akamyufu ka NRM, ak’okulonda ababaka ba parliament abanaakwatira ekibiina bendera mu kulonda kwa bonna okwa 2026.
Kigambibwa nti waliwo akwatiddwa ng’ateeberezebwa okubeera ne bbomu ekika kya Grenade mu bitundu bya Isingiro South, so ng’abantu 90 bebakwatiddwa ab’ebyokwerinda okwetoloola eggwanga lyonna nga kigambibwa nti babadde benyigidde mu mivuyo gy’akalulu.
Okulonda okutegekeddwa nga 17 July,2025, kwatandise ssaawa ssatu ezookumakya okutuuka ku ssaawa munaana ez’olweggulo, nga kubadde kwakusiimba mu mugongo gw’abesiimbyewo oba ebifaananyi byabwe.
Abamu ku babaka ababaddeyo mu parliament, wabula nga babadde baasala eddiiro okuva mu bibiina ebiri ku ludda oluvuganya nebesogga NRM, basuuliddwa ettale.
Omubaka Dr.Twaha Kagabo eyalondebwa mu kalulu ka 2021 mu kibiina kya NUP wabula oluvannyuma neyesogga NRM, awanguddwa Hajji Muyanja Mbabaali.
Omubaka wa Kirak North Anthony Akol eyali munna FDC neyesogga NRM, naye akalulu kamumezze.
Mu kibuga ky’E Ntebe; abakulira akakiiko kebyokulonda aka NRM mu Kibuga kino, balangiridde munnamateeka Shaka Stephen Gashaija ku buwanguzi, okukwatira ekibiina Bendera ku kifo ky’omubaka wa Munisipaali eyo.
Paul Wasike akulira akakiiko ka NRM akebyokulonda mu kibuga Ntebe, alangiridde Gashaija nga afunye obululu 4,175, n’addirirwa Najjemba Jane Scholastica Baguma, abadde sentebbe wa Division A n’obululu 467, ate Jovia Namara nakwata eky’okusatu n’obululu 192.
Omugatte abalonzi mu kibuga Ntebbe babadde 4,834, wadde nga mu kitabo ky’abalonzi ekya Yellow Book mulimu abalonzi 21,507.
Ate Ku kifo kyomubaka omukyala owe Wakiso, eyaliko RDC we Ntebe ne Wakiso; Nalongo Rose Kirabira y’awangudde banne abalala 2, n’obululu 2,808.
Nnaalongo Rose Kirabira adiriddwa Namakula Radhidiya n’obululu 1,040 ate Kakunda Beth Kayesu, afunye obululu 362.
Mu district ye Mityana ebifo bisatu mwemubadde okulonda, nga okusinga embiranye eri mu Mityana North eno abavuganya bali lyanda ku lyanda, nga mu kiseera kino kizibu okumanya anaatwala.
E Kasambya town Council mu district ye Mubende sentebe wa NRM bimusobedde, erinnya lye bweritalabikidde mu alijesita y’ekyalo.
E Ssembabule eby’okwerinda bibadde ggulugulu, kyekimu ku bitundu ebiyiiriddwamu ab’ebyokwerinda amagye ne police naddala mu kitundu ekye Lwemiyaga, era ng’eno abalonzi abamu bakubiddwa emiggo, n’abalala bakwatiddwa balabiddwako nga bakasukibwa mu kabangali y’abebyokwerinda.
Ate Okulonda mu Nakawa West kutambudde bulungi, wadde ng’abalonzi babadde bamuswaba.
Waliwo omulonzi afiiridde mu nnyiriri ku kyalo Gobero ηηoma mu district ye Nakaseke.
Okusinziira ku mwogezi wa police mu kitundu ekyo Sam Twinamazima agambye nti abasawo bakufulumya alipoota ku kimusse, wabula nga bateebereza nti yandiba ng’afudde pressure.
Mu mbeera yeemu Waliwo ebyalo 2 ebiremereddwa okulonda mu ggombolola ye ηηoma mu district ye Nakaseke, nga kigambibwa nti eno waliyo banna magye abazze ne pisito nebatiisatiisa abalondesa, era nebakwatamu obwabwe nebadduka okwetegula ekibambulira.
Akulira eby’okulonda mu Nakaseke Paul Tandeka agamba nti Kijjumba ne Butebere tebalonze kyokka ono agamba nti emivuyo gino tegigenda kukosa bivudde mu kulonda
Abanene mu NRM abawangudde
Omubaka Moses Ali owa Adjumani North awangudde, Rebecca Kadaga awangudde e Kamuli, omumyuka wa sipiika wa parliament Thomas Tayebwa awangudde mu Ruhinda North, Mathias Kasaija, Omumyuka wa President Jesca Alupo, minister Kyofatogabye,Jim Muhwezi n’abalala.
