Abamu kubalwanirizi b’eddembe ly’obuntu bagala enkola y’e kibiina kya NRM okwambala engoye z’eggye lya UPDF nga bali mu lusirikale lwabwe e Kyankwazi eddemu okwetegerezebwa, nti kubanga yandiba ng’emenya amateeka agafuga eggye ly’eggwanga agaayisibwa omwaka ogwayita 2025.
Parliament yayisa etteeka oluvanyuma lwa kooti ensukkulumu okuluηamya ku ensonga eno, era ne muteekebwamu obuwaayiro obuggya eri abambala engoye eziringa eza UPDF, eza UPDF zennyini, okukozesa obubonero bw’amagye n’okwenyigra mu bikolwa by’amagye ebirala nga toli munnamagye.
Abakulembeze ba NRM bwebaabadde mu lusirikale lwabwe e Kyankwanzi olwamaze wiiki namba nga luyinda, baayambadde ngoye z’eggye ly’eggwanga nga kuliko n’ebigambo bya UPDF.
Baasomeseddwa ku nsonga z’obukulembeze naddala eri ababaka parliament abakyali abaggya, era nebakubaganya n’ebirowoozo ku nsonga ezitali zimu.
Mu mbeera eno ababaka era benyigidde ne mukuyiga okukuba emmundu, babadde bakulembeddwamu ssentebe we kibiina kyabwe era omukulembeze wa Uganda Gen Yoweri Kaguta Museveni Tibuhabulwa.
Ssenkulu w’e kitongole ekirwanirira eddembe ly’obuntu ki Foundation for Human Rights Intitative Dr Livngstone Ssewanyana agamba NRM kyekola kisanye okwetegerezebwa kuba bannauganda bangi bakwatiddwa olwokwambala engoye ezeefaanaanyiriza ez’agye naddala banakibiinaa kya NUP.
Wabula CBS mukwogerako ne ssentebe w’ababaka ba NRM mu Buganda Robert Migadde Nduggwa agambye nti engoye za UPDF bazambalira mu mateeka nga bagenze okutendekebwa mu by’obukulembeze e Kyankwanzi nti kubanga basooka kusaba lukusa era ne bassa n’emikono ku biwandiiko okugoberera amateeka agazifuga.
Mu ngeri yeemu Migadde annyonyodde nti tewali tteeka lyonna lyebamenya nga bali e Kyankwazi kuba enteekateeka bwetyo bweyakolebwa nga bonna abagenda okutendekebwayo bwebalina okwambala.#
