Ssetendekero w’Obwakabaka owa Muteesa The First Royal University yesozze oluzannya olwakamalirizo olw’empaka ez’omupiira ogw’ebigere eza matendekero agawaggulu eza Pepsi University Football League 2026.
Muteesa The First Royal University okutuuka ku final erumbye St Lawrence University omwayo mu kisaawe e Kavule Katende n’egikubirayo goolo 3-1mu mupiira ogubaddeko n’okuluma obugigi.
Mu mupiira Muteesa One Royal University gwesinze okwefuga ebitundu ebingi, goolo ezigiwadde obuwanguzi zitebeddwa Katende Eric mu dakiika eya 22, Lutwama Ali mu dakiika eya 37 ne Rwothomio Brain mu dakiika eye 66.
Muteesa The First Royal University ekoze ekyafaayo ddala mu mpaka zino bwegenze ku final omulundi gwayo ogusokedde ddala newankubadde empaka zino ezetabyemu mulundi gwakubiri, nga omulundi gwayo ogwasooka season ewedde yawandukira ku quarterfinal.
Mumbeera yeemu Muteesa The First Royal University etuuse ku final eno nga ekubiddwamu omupiira gumu gwokka.
Kati ku final Muteesa One Royal University egenda kuzuzumba ne YMCA nga 02 omwezi ogujja ogw’okutaano mu kisaawe ekigenda okulangirirwa gyebujja.
Akulira abayizi ku ssetendekero wa Muteesa The First Royal University Paddy Kiganda, akakasiza Obuganda nti ekikopo kibali mu ttaano, kuba ku mulundi guno bajja n’ekigendererwa kyakuwangula mpaka zino.
Bisakiddwa: Isah Kimbugwe
