Parliament eyisizza etteeka erya The National Teachers’ act 2024, erigendereddemu okuwandiisa, okulungamya, okubangula, n’okulondoola enneeyisa y’abasomesa mu ggwanga.
Etteeka lino likifudde kya buwaze buli musomesa okubeera n’obuyigirize obutandiikirwako obwa degree, awamu n’okubeera ne certificate ebakkiriza okukola omulimu gw’obusomesa.
Etteeka lino eriyisiddwa linywezezza ebirowoozo n’ebiteeso ebyalambikibwa olukiiko lwaba minister mu 2019 National Teachers Policy.
Etteeka lino litonzeewo akakiiko k’eggwanga akavunaanyizibwa ku nsonga z’abasomesa ka National Teachers Council, kano nga kekakwasiddwa obuyinza obw’okuwandiisa n’okuwa licence eri abasomesa, okukwasisa empisa mu basomesa, n’okulondoola obukugu bwabwe.
Akakiiko ke kamu kalina akalina okukola ku kizibu ky’abasomesa abebulankanya ku masomero.
Etteeka lino eriyisiddwa, littaddewo obuyigirize obwessalira bwa degree eri buli musomesa okukkirizibwa okusomesa abaana b’eggwanga.
Abasomesa mu kiseera kino nga tebalina degree,watereddwawo enteekateeka mu tteeka lino, etuumiddwa ‘Continuous Professional Development’ egenda okuyambako abatalina degree okweyongerayo okuzifuna nga government ebakwatirako.
Mu tteeka lino, kifuuliddwa kyabuwaze buli musomesa okufuna Certificate emukkiriza okusomesa abaana b’eggwanga, nga Certificate eno yakufunibwa okuva eri akakiiko ka National Teachers Council.
Certificate eno yakuzibwanga obuggya buli luvannyuma lwa myaka e 4, so nga era yakusazibwangamu singa omusomesa yeeyisa mu neeyisa etajja nsa etyoboola etteeka lino neneeyisa y’abasomesa mu ggwanga.
Ssentebe w’akakiiko ka parlament akolondoola ebyenjigiriza n’emizannyo James Kubeketerya, abuulidde parliament nti etteeka lino liriko enkyuukakyuuka mpitirivu zerireeese mu byenjigiriza, omuli okuwandiisa okw’obuwaze eri abasomesa bonna mu ggwanga, okubeera ne Certificate ezibakkiriza okukola omulimu gw’obusomesa saako okukola Internship.
Mu kuwa abasomesa certificate ezibakkiriza okukola omulimu gw’obusomesa, akakiiko ka National Teachers Council kakukolera wamu n’akakiiko keggwanga akavunaanyizibwa ku byenjigiriza n’amatendekero agawaggulu ka National council for Higher education.
Abassomes abatalina certificate ezibakkiriza okukola omulimu gwobussomesa SSI bakukkirizibwa kusomesa.
Etteeka lino likwata ku basomesa okuli aba nursery oba pre primary, aba Primary ne secondary.
Abasomesa n’amatendekero agawagggulu okuli Universities, institutes n’amalala bbo baluηηamizibwa mu tteeka eddala erya the Universities and other Tertiary institutions Act.#
