Ttiimu ye Ssaza Kyaggwe ewangudde ekifo ekyokusatu mu mpaka z’amasaza ez’omwaka 2025, bwekubye Bugerere ggoolo 1-0.
Kyaggwe ggoolo yaayo ejiwadde obuwanguzi ejiteebedde mu kitundu ekisooka, era nga Kyaggwe esubiddwa emikisa mingi ejivaamu ggoolo ez’enjawulo era omukwasi wa ggoolo ya Bugerere abadde ku bunkenke.
Kyaggwe okuwangula omupiira guno, kijiwanguzza obukadde bwa siringisi 7 ate banna Bugerere abakutte ekifo ekyokuna nebasitukira mu bukadde bwa siringisi 5.
Abazanyi b’amasaza g’ombiriri nabakulembeze ba ttiimu bonna baweereddwa emidaali, egibakwasiddwa omumyuka akasooka owa Katikkiro, Prof. Dr. Twaha Kaawaase Kigongo.
Ssabasajja Kabaka yasiimye okujja okwetaba ku mpaka ez’akamalirizo eziri mu kisaawe kye Nakivubo.
Ssekamwa Abdullah Salim omukwasi wa ggoolo ya Bugerere agambye nti wadde bakutte kyakuna omwaka guno, bakwongeramu amaanyi omwaka ogujja 2026.
Omwami w’essaza Kyaggwe, Ssekiboobo Vincent Matovu Bintubizibu, agambye nti basanyufu olwokuwangula ekifo ekyokusatu era omwaka ogujja bawera okuwangula ekikopo.
Bisakiddwa: Ddungu Davis
