Government ya Uganda eyimirizza ennyonyi zonna ezibadde zigenda n’okuva mu ggwanga lya Democratic Republic of Congo okuyingira Uganda, saako emmotoka endala ezisaabaza abantu n’amaato ku mazzi naddala ku mugga Ssemuliki, okwewala okusaasaana kw’ekirwadde kya Ebola.
Government era erangiridde nti mu district eziriraanye, ensalo ya Uganda ne DRC tezikirizibwa kuddamu kukola mikolo ejikuηηaanya abantu abangi omuli egy’embaga, ebivvulu, n’emikolo egyobuwangwa, obutale bw’omubuulo n’emirala.
Government yekengedde nti ekirwadde kino ssinga tewabaawo kikolebwa eky’amangu, kyanditandika okusaasaana mu Uganda.
Ministry yeebyobulamu mu Uganda egamba nti bafuba okulwanyisa ekirwadde kino, wadde kyeyongedde amaanyi mu DRC, era nga n’abantu ababiri abaazuuliddwa nabwo mu Uganda nabo bannansi ba Congo.
Abadde Omulwadde wa Ebola omulala akyali mu ddwaliro e Mulago, wadde nga yajjanjabiddwa naawona bulungi, sso nga omulala owemyaka 59 omusajja yafa nga 14 May,2026 mu Kampala.
Dr.Diana Kanziira Atwine, omuteesiteesi omukulu mu ministry yeebyobulamu agambye nti bino baabituuseko mu nsisinkano y’akakiiko ka National Taskforce ekubiriziddwa omumyuuka wa president era omubaka we Katakwi, Rtd Maj.Jessica Alupo.
Dr.Atwine agambye mu kiseera kino mu Uganda temuli Ebola, era ng’essira liteekeddwa ku kwetaangira kirwadde, nga bakebera abantu, okujjumbira okunaaba mu ngalo, okwewala ebifo ebikuηηaanya abantu abangi.
Dr. Diana Kanziira Atwine, mukwogerako ne bannamawulire ku ssengejjero ly’amawulire ga government mu Kampala, agambye nti wadde ebifo ebimu biyimiriziddwa, naye abasaabaza eby’amaguzi ng’emmere, n’ebirala ebikozesebwa bakusigala nga bakola.
Ebola bulwadde obuleetera omuntu okukolola ekisusse, okulumizibwa mu kifuba, okutanaka, Embiro, okufuukuuka kw’emmeeme, omusujja ogw’olutentezi, amaaso okumyukirira, okuyiwa ebituluttuttu ku lususu, n’okuyisa omusaayi.
Bisakiddwa: Ddungu Davis
