Ministry y’ebyobulamu ekalambidde nti ssiyakukyusa mutemwa gwansimbi ezigenda okusasulwa abayizi abasoma obusawo abagenda okugezesebwa mu nkola eya Medical Interns, wadde president Museven yalagira bafune omutemwa omulala.
Ministry y’ebyobulamu egamba nti nomwaka guno 2024 /2025 abayizi abagenda okugezesebwa yakubasasula akakadde ka shs 1,000,000/=, okwawukanako n’obukadde 2 nekitundu obwabalagirwa president mu nsisinkano gyebalimu naye.
Enteekateeka y’okusasula abayizi abasoma obusawo mu nkola ey’okugezesebwa oba internship, abayizi okufuna akakadde akamu kyatandika mwaka oguwedde sso ng’emabega baali bafuna obukadde 2 neekitundu.
Kenneth Akirri omukungu mu Ministry yeebyobulamu, asinzidde ku Makerere University, mu lukungaana lw’okwekubamu tooki ku nteekateeka yaabayizi abagenda okuwandiisibwa batandike okugezesebwa mu malwaliro ga government oba internsihip naagamba nti government terina nsimbi zakusasula abayizi kuba bangi ddala.
Prof. Waswa Ssarongo, awabudde abayizi abagenda okugezesebwa okuba ekyokulabirako nokweyisa obulungi, okuwuliziganya naabalwadde mu malwaliro gyebagenda okusindikibwa nebirala.
Joseph Socrates Odongo, ku lwa bayizi abagenda okugezesebwa akukulumye olwabayizi abamu abatawebwa mukisa kugezesebwa naddala abawala abali embuto.
Abayizi 2,300 bebagenda okugabibwa mu malwaliro 52 okwetoloola eggwanga lyonna.
Okusinziira ku kiwandiiko ekifulumiziddwa ministry y’eby’obulamu nga kiteereddwako omukono gwa director avunaanyizibwa ku by’obulamu byonna, Dr. Henry G. Mwebesa, kitegeezezza nti abayizi abaamaliriza emisomo gyabwe mu myaka egikka wansi wa 2023 abaali basigalira, bebagabiddwa mu malwaliro oga government okutandika okugezesebwa.
Abaamalirizza mu 2024 bakulowoozebwako oluvannyuma.
