Ekibiina ekiddukanya omupiira mu Uganda ekya FUFA kiwaddeyo emipiira gyonna egya Uganda Premier League egigenda okuzannyibwa okuva ku Thursday, okuwaayo akadde ak’okusirikiriramu okujjukira omwoyo gw’omugenzi Darius Mugoye abadde omumyuka ow’okubiri owa president wa FUFA.
FUFA ekakasiza nti buli mupiira ogugenda okuzannyibwa, wakubaawo okuwayo edakiika emu nga tegunatandika okujjukira omugenzi, era abazannyi nabatendesi bajja kusiba obuwero obuddugavu ku mikono ng’akabonero k’okujjukira omugenzi.
Mu mupiira ogwazannyiddwa wakati wa club ya Kampala Queens neya Queen Cranes U20 abawala abali wansi w’emyaka 20 ogwabadde mu kisaawe kya MTN Omondi e Lugogo baawaddeyo akadde ak’okusiriikirira okujjukira Mugoye.
Mu ngeri yeemu bannabyamizannyo bamusabidde mu lutikko e Namirembe, ate oluvanyuma bagenda kwolekeza e Sheema gy’agenda okuziikibwa ku Thursday nga 09 November,2023.
Okusaba okwasooseewo n’okumukubako eriiso evvanyuma kwabadde ku kitebe kya FUFA e Mengo, era omukolo guno gwakulembeddwamu sipiika wa Parliament ya Uganda Anita Among.
Yayogedde ku mugenzi nti Uganda egenda kumusubwa nnyo olw’okwagala n’obukozi bwabadde nabwo eri omuzannyo gw’omupiira.
Darius Mugoye yafiiridde mu ddwaliro e Mengo, era abadde musaale nnyo munteekateeka za Uganda ng’ekolagana ne Kenya ne Tanzania okutegeka empaka za Africa Cup of Nations ez’omwaka 2027.
Bisakiddwa: Isah Kimbugwe
