Obwakabaka bwa Buganda bukakasizza nti empaka z’ebika bya Baganda ez’omupiira ogw’ebigere n’okubaka zigenda kutandika nga 02 omwezi ogujja ogw’okutaano, 2026 mu kisaawe e Wankulukuku.
Bino byanjuddwa mu lukiiko olw’abakulembeze ba ttiimu z’ebika bya Baganda, abetabye mu lukiiko olukiiko oluteesiteesi ne minister w’a bavubuka ow’ebyemizannyo n’ebitone Owek Ssaalongo Robert Sserwanga olutudde ku mbuga ya Buganda e Bulange e Mengo.
Olukiiko lukakasizza nti okuwandiika ttiimu ezigenda okuvuganya mu mpaka zino ku kyagenda mu maaso, era mu bwangu ddala bagenda kulangirira omupiira ogugenda okuggulawo empaka zino.
Owek Ssalongo Robert Sserwanga asabye abakulembeze ba ttiimu z’ebika okuwaayo amaanyi gaabwe okusitula ettuttumu ly’empaka zino, nga buli omu ayamba ekika kye nga bwasobola.
Kabugo Mansoor avunanyizibwa ku mirimu egy’ekikugu ku lukiiko oluteekateeka empaka zino, agambye nti ebisaawe okuli Wankulukuku, Kabaka Kyabaggu e Wakiso, Lubiri SS, Kibuli SS ne Kawanda SS bye bimu ku bisaawe ebigenda okukozesebwa mu mpaka zino.
Bazzukulu ba Nsamba abe Ngabi be baawangula engabo ey’omupiira ogw’ebigere eyasembayo bwe bakuba Endiga goolo 6-5 eza peneti oluvannyuma lw’okulemagana goolo 2-2.
Ennyonyi Ennyange yawangula engabo ey’okubaka, baakuba Emmamba obugoba 32 ku 27.
Bisakiddwa: Issah Kimbugwe
