Kisambira Stanley eyakola akatambi akasaasanira omutimbagano ngálumiriza ekitongole ekiramuzi okumusasula omusaala omutono kyokka ngávuga omulamuzi owekitiibwa, asindikiddwa ku alimanda kkomera Luzira okutuusa nga 02 June, 2023.
Kisambira asiimbiddwa mu kooti n’aggulwako omusango gw’okwogerera abalamuzi amafukuule n’okusiga obukyayi.
Kisambira abadde agenze ku Police ya CPS mu Kampala okweyanjulayo, oluvannyuma lwokuyimbulwa ku kakalu ka Police wiiki ewedde.
Wabula olutuuse ku police atwaliddwa mu kkooti ya Buganda Road mu Kampala naggulwako omusango gw’okusaasaanya obulimba( promoting Hate Speech) nekigendererwa kyokutuusa obulabe ku balamuzi.
Omusango agwegaanye kyokka Bannamateeka be abakulemberwamu Derrick Bazzekuketta nebegayirira kkooti ekkirize ewulirize okusaba kw’omuntu wabwe okweyimirirwa.
Wabula omulamuzi w’eddaala erisooka ku kkooti eno Fidelis Otwao agaanye okuwulira okusaba kuno, bwategeezezza nti omulamuzi ayina okuwulira okusaba kuno taliiwo ate nga n’omuwaabi wa Government akola ku musango guno tabaddewo mu Kkooti.
Omulamuzi awo wasinzidde n’asindika Kisambira ku alimanda e Luzira okutuusa nga 2nd June,2023.
Okusinziira ku mpaaba ya kkooti, nga 12th omwezi guno ogwa May, Kisambira yekwata ku katambi akaasaasanira omutimbagano, ng’alumiriza ekitongole ekiramuzi okumusasula obusente obwolusuluuju ng’omusaala, kyokka ng’abalamuzi baavuga basasulwa omusimbi muyitirivu.
Obujulizi era bulumiriza Kisambira okwagala okutuusa obulabe ku balamuzi nti kubanga mu katambi akyogera lunye nti asobola okukola akabenje, omulamuzi gwavuga n’afiiramu n’omukuumi we.
Gyebuvuddeko Kisambira yategeeza nti kituufu asasulwa emitwalo 237,000 buli mwezi ensonga omuteesiteesi omukulu mu kitongole ekiramuzi Pius Bigirimana gyeyasambajja, ngagamba Ono asasulwa ensimbi ezisukka mu shs akakadde kalamba n’emitwalo asatu (1.3M shs.)
Bisakiddwa: Mpagi Recoboam
