Liigi ya babinywera eya Bungereza season ya 2025/26 ekomekerezedwa olwaleero nga 24 May,2026, nga bannantameggwa aba Arsenal bakwasiddwa ekikopo kyabwe mu butongole.
Arsenal okuwangula ekikopo kya premier kyabyafaayo eri abawagizi baayo, ebadde emaze emyaka 22 nga tewangula kikopo kino.
Abawagizi baayo mu Bungereza n’amawanga agenjawulo nga ne Uganda mwojitwalidde bayisizza ebivvulu n’okucacanca mu ngeri ez’enjawulo.
Arsenal ekubye Crystal Palace goolo 2-1 mu mupiira ogusembyeyo, ng’ewangudde liigi n’obubonero 85 okuva mu mipiira 38.
Man City ekutte kyakubiri n’obubonero 78, Manchester United kyakusatu n’obubonero 71, Aston Villa kyakuuna n’obubonero 65, Liverpool kyakutaano n’obubonero 60, nga bonna bagenda kukikirira Bungereza mu mpaka za Champions League season ejja.
Club ya Wolves, Burnley ne West Ham United zisalidwako okuddayo mu kibinja ekyawansi ekya Championship.
Emipiira emirala egisembyeyo Manchester United ekubye Brighton goolo 3-0, Burnley egudde maliri ne Wolves goolo 1-1, Fulham ekubye Newcastle goolo 2-0, Liverpool egudde maliri ne Brentford goolo 1-1.
Aston Villa ekubye Man City goolo 2-1, Nottingham Forest egudde maliri ne Bournemouth goolo 1-1, Sunderland ekubye Chelsea goolo 2-1, Tottenham Hotspurs ekubye Everton goolo 1-0 ate nga West Ham United ekubye Leeds United goolo 3-0.
Bisakiddwa: Isah Kimbugwe
