Police mu district ye Wakiso ng’eri wamu n’abakulembeze ku kyalo Kigoogwa ku luguudo lwe Bombo, bamalirizza okufuna olukalala lw’amannya g’abantu b’ekitundu abaafiiridde mu muliro ogwakutte emmotoka y’amafuta, kibayambeko okumanya omuwendo omutuufu ogw’abantu abaafiridde mu muliro guno.
Ku Tuesday ya wiiki eno nga 22 October, emmotoka y’amafuta yagudde mu kabuga k’e Kigoogwa Matugga, ku luguudo oluva e Kampala okudda e Bombo.
Abantu baatandise okwerembekera ku mafuta ng’emmotoka yakagwa, wabula omuliro negubalukawo negubookya, saako abaabadde batambula agaabwe, n’abaabadde mu maduuka gabwe nga bakakkalabya.
Ssentebe w’ekyalo Kigoogwa Ssenkumba John agambye nti bakafuna amannya g’abantu abamanyiddwa mu kitundu 15 abagambibwa nti bebaafiridde mu muliro guno, naye waliwo naabayise abatamanyiddwa mannya.
Ekirindiriddwa kwekutwala ab’oluganda lw’amannya gebakafunawo, batwalibwe mu malwaliro bekebejjebwe endagabutonde okuzuula abantu babwe abatuufu, kubanga emirambo gyonna gyayidde nejifuuka bisiriiza.
Mu kiseera kino omuwendo gw’abaafudde ogwakakasiddwa gw’abntu 15, olw’ebisigalira byabwe okuba ng’ebisiinga byafuuse bisiriiza, naddala abaafiiridde okumpi n’ekimmotoka, ate abantu abasoba mu 30 bebagambibwa okubeera mu malwaliro ag’enjawulo.
Atwaala eddwaliro lye Kiruddu Dr.Kabugo Charles, ategeezezza nti mu ddwaliro lino balinayo abalwadde 25 abaatwaliddwayo nga bayidde nnyo.
Bisakiddwa: Lukenge Sharif.
