Abasawo mu ddwaliro lya Kitamiiro Health Centre IV mu bizinga bye Buvuma bakonkomadde n’ebigalani ebikuuma omusaayi ebyabawebwa kati emyaka 5 egiyise tebikola, amasannyalaze agali ku ddwaliro ga maanyi matono tegasobola kubiwanirira.
Abasawo abataagadde kubaasanguza mannya bagamba nti waliwo omuzira kisa eyabawa akafo katono nnyo mwebasobola okutereka omusaayi naye nga guba mutono, era abalwadde abasinga bawalirizibwa okubasindika mu malwaliro amalala nga Jinja, Kawolo ne Kayunga kyokka nga kibakaluubiriza nnyo olw’obutaba na nsimbi za ntambula ezibatuusaayo.
Ssentebe wa district y’eBuvuma Wasswa Adrian Ddungu agamba nti baatuukirira abakulu mu government abakwatibwako ensonga, era newabaawo abantu bebaaweereza okupima ekifo okulaba ebyetaagisa, kati emyaka 2 tewali kyali kikoleddwa.
Bisakiddwa: Ssebwami Denis
