Abasirikale ba police y’okunguudo 3 bakwatiddwa mu district ye Bukomansimbi, ku bigambibwa nti babadde bateega abagoba b’ebidduka naddala aba pikipiki nebabakanda ensimbi.
Kigambibwa nti abasatu bano babadde bava mu district ye Masaka gyebakolera, nebalinnya pikipiki zabwe akawungeezi nebagenda okusolooza ensimbi mu Bukomansimbi gyebatakolera.
Abagoba ba bodaboda mu bitundu bye Kawoko mu gombolola ye Butenga baludde nga bemulugunya ku basirikale bano, okutuusa ab’ebyokwerinda bwebaasudde enkessi nebaba mu buwuufu.
Kigambibwa nti munnabwe eyakyusibwa okuva mu district ye Bukomansimbi n’atwalibwa e Masaka, yabadde abakulemberamu nebagenda nebagumba mu Bukomansimbi gyebabadde banyagira abagoba b’ebidduka.
Amyuka RDC w’e Bukomansimbi Kalema Fred Pax agambye abasirikale abakwatiddwa bakyakuumibwa mu kaduukulu ka police e Bukomansimbi nga bwebakyetegereza ensonga eno n’abakulira police mu bitundu bye Buddu.
Bisakiddwa: Ssebuufu Mubarak Junior