Akabenje kano kagudde mu katundu kebayita Ndikuttamadda wakati wa Mpugwe ne Matanga, ku luguudo mwasanjala oluva e Masaka okudda e Kampala nga kabaddemu emmotoka 4.
Emmotoka loole ebadde etisse ebbumba okilijja e Masaka ng’eritwala e Nakasongola eremeredde omugoba wayo ng’erinnyalinnya akasozi etuuke mu ka town ke Matanga, olwo nedda emabega gyesanze akamotoka akatono nekasammula mu luguudo wakati, olwo yo nekkirira negwa mu mukutu emabbali w’oluguudo.
Mu kiseera ekyo waliwo lukululana bbiri okubadde eye ggwanga lya Rwanda ezibadde zikkirira nga zigobagana, omugoba wa lukululana ebadde mu maaso yekanze akamotoka akabadde mu ekkubo naasiiba, olwo ate lukululana eyabadde egivaako emabega negitomera ekitwe kyayo kyonna nekiggwawo.
Omuntu omu abaddemu afiiriddewo era omulambo bagutemyemu butemi ngate dereeva ye addusiddwa mu ddwaliro nga biwalattaka.
Abantu abalala babiri bafiiriddewo mu kabenje k’emmotoka akagudde mu kibuga Masaka okumpi n’enkambi ya UPDF eye Kasijjagirwa.
Loole lukululana number KCL 438X-ZF 793 eyekika Kya Benz ebadde eva ku Sundiro lya Mafuta erya GAZ e Kijjabwemi mu kibuga Masaka, ebadde egatwala Kalangala, bwetomereganye ne Loole Fuso number UBK 576N Dereeva wa Fuso ategerekese nga ye Kyaluzi Profit omutuuze we Isingiro ne munne Gaddafi Nyabugando naye omutuuze we Isingiro bafiiriddewo.
Police y’ebidduka ne Police enzikiriza omuliro banguye mangu okutuuka mu kifo awagudde akabenje okwerinda embera ebadde eyinza okuddirira.
Police ekutte Dereeva wa lukululana eyamafuta ategerekese nga ye Ali Bekaru nemuggalira ng’ono kigambibwa nti yavuddeko akabenje kano olw’okuvugisa ekimama.
Bisakiddwa: Tomusange Kayinja
