Minister w’Obuwangwa, Ennono, Embiri, Amasiro, Ebyobulambuzi, Ebyokwerinda n’Olulimi Oluganda Owek. Dr. Anthony Wamala awabudde abaluηamya/ aboogezi b’okumikolo okwettanira okubangulwa entakera, olwo batambulire ku miramwa emituufu mu ntambuza y’emikolo gyebakulemberamu.
Owek. Wamala abadde aggalawo Ssemasomo w’abaluηamya b’okumikolo amaze ennaku bbiri mu Bulange e Mmengo, agambye nti kisaanidde aboogezi bulijjo okutwala obwogezi ng’omulimu gwennyini gwebateekeddwa okuyiiyiza n’okutambulira ku mateeka agagufuga, n’okuguwa ekitiibwa.
Owek. Wamala mu ngeri yeemu abasabye okubeera eddoboozi lya Buganda n’oluwenda mweyita okusomesa abantu ba Kabaka ensonga z’Obuwangwa ez’enjawulo, n’okumanyisa abantu nti Obuwangwa tekitegeeza kusamira kwokka, wabula empisa zonna ezitwawula ku bantu abalala.
Ssentebe w’abaluηamya mu Buganda Ismail Kaggya asabye minister abayambeko atuuse eddoboozi lyabwe eri abakulembeze mu masaza ag’enjawulo bakwatagane bulungi n’abaluηamya era nga bagoberera n’empeereza zaabwe.
Kaggya agambye nti ono ye Ssemasomo ow’omulundi ogw’omukaaga okuva lweyatongozebwa Katikkiro Charles Peter Mayiga mu September wa 2021.
Agambye nti abaluηamya 1357 bebayise mu bbanguliro lya Ssemasomo, n’asaba abaasooka okubangulwa okwettanira okuzza obuggya ebiwandiiko byabwe omuli n’olukusa oluva mu Bwakabaka okubatongoza okukola obuweereza buno.
Abaluηamya abeetabye mu Ssemasomo ono babanguddwa mu masomo ag’enjawulo okuli; Okukyala n’okwogereza mu Buganda, Ennono y’okwanjula n’okwanjulwa, Enkozesa y’olulimi mu mikolo, Ensobi enneemanyiize aboogezi zebeesibako, Obuvunaanyizibwa bw’omulungamya, Okuwasa kw’Abalangira n’Abalongo.
Babanguddwa abakugu okuli, Omuzira mu Bazira wa CBS Ssaalongo Kabanda Abby, Omulangira Kayemba Kayran, Hannington Ssonko Kavi, Ismail Kaggya, Nakibinge Deo n’abalala.
Ababanguddwa baweereddwa Ebbaluwa ezibakakasa, Endaga-mwogezi n’ekitabo kya Ssemasomo.
Bisakiddwa: Kamulegeya Achileo K
