Police mu Kampala n’emiriraano eri etandise okunoonyereza ku bubbi bw’ensimbi akawumbi ka shilling kamu n’Obukadde 69, obwakolebwa abagambibwa okubeera abakozi ba kampuni ya G4S
Obubbi bwaliwo nga 19 November,2024.
Kigambibwa nti abakuumi bano abaali batambuza ensimbi okuva e Lubowa okudda e Nakasero, beekobaana n’abantu abatannamanyika nebanyaga ensimbi, oluvannyuma emmotoka ya kampuni ya G4S No. UAJ 199T nebagisuula ku luguudo Nabunya mu gombolola ye Rubaga, n’Emmundu bbiri nebazireka omwo.
Omuntu omu nga ye Otim Ambrose Richard omu ku bagambibwa okubeera abakozi mu kampuni eno, akwatiddwa n’Obukadde bwa shs 117, nga zeezimu ku nsimbi eziteeberezebwa okubeera enzibe.
Omukwate akukunuddwamu district ye Kwania.
Amyuka omwogezi wa police mu Kampala n’Emiriraano Luke Oweyisigire, agambye nti kaweefube w’Okuzuula ensimbi endala ezikyabuze akyagenda mu maaso.
Bisakiddwa: Kato Denis
