Omukago ogutaba abakozi ba bank n’emirimu gy’ebyensimbi ogwa Uganda Banking and Financial Services, nógutaba bank z’ebyobusuubuzi ogwa Uganda Bankers Association, (UBA), batongozza kawefube agendereddemu okuyambako abakozi ba bank okukola dduyiro okulwanyisa endwadde ezitasiigibwa n’ezitawaanya obwango.
Kaweefube ono bamutumye Wellness Challenge, bamutongozza n’okutambula ekiro meter ‘ssatu (3), etaano (5) n’omusanvu (7), okwetolola ebitundu bya Kampala ebyenjawulo, basiimbudde ku kitebe kya Uganda Bankers Association e Muyenga.
Enteekateeka eno yakumala ennaku 30, ng’abakozi mu bank ezenjawulo bakukulemberamu bannabwe okutambuza ebigere, buli lunaku bakutambula ebigere wakiri 5,000 okuva mu wofiisi okugenda ewaka oba okuva ewaka okugenda ku mirimu.
Mary Gorreti Masadde, ssenkulu wa Uganda Banking and Financial services, bwadde ku mukolo ogwokutongoza okutambula kuno, agambye nti kino kigenda kuyambako ku byobulamu byabakozi mu bank n’ebitongole ebyenjawulo ebyagala okwetaba mu kawefube ono, era abanasinga okujjumbira bakuweebwa ebirabo.
Agambye nti bakuvuganya ne mu mpaka ez’emizannyo emirala ejizanyirwa mu bisenge munda n’ebweru nga mu bisaawe omuli okubaka, okwepena, okusamba, omupiira nemirala , ng’ekiruubirwa kukuuma mibiri gyabakozi ba bank nga miramu, okweggyako ebirowoozo, n’okuweereza abantu nga basanyufu.
Agambye nti bataddewo ne App etuumiddwa Fitness App, egenda okulondoola abantu abatambula, okuteekawo okuvuganya mu nteekateeka eno okulungi okutuusa lwebanakomekereza enteekateeka yonna mu mwezi gwe 11.
Phillip Andrew Wabulya, kulwa governor wa bank ya Uganda enkulu, Michael Ating-Ego, agambye nti bank enkulu yakuwagira kaweefube ono, kuba ayambako enzirukanya y’emirimu mu bakozi, okuwaηana amagezi n’okuteekawo okuvuganya okwemirembe mu ggwanga.
Ssenkulu wa Uganda Bankers Association, Wilbrod Owor, agambye nti bank ezisoba mu 20 zezigenda okwetaba mu kawefube ono okuli ABSA Bank, DFCU, Stanbic, Centenary, Standard Chartered Bank, Equity, Post Bnk, UBA, UDB, Finca nendala, ku mulwa ogugamba nti “Okusukuluma okukirawo”.
Bisakiddwa: Ddungu Davis
