Obwakabaka bwa Buganda Butenderezza emirimu gya taata wa Ssaabalabirizi w’e Kkanisa ya Uganda Samuel Kazimba Mugalu, nga ye mugenzi Besweri Kaddu eyafiiridde ku myaka 93 egy’obukulu nti emirimugye gikoze ky’amaanyi mu nkulaakulana y’eggwanga.
Bibadde mu Bubaka bw’omumyuka ow’okubiri owa Katikkiro era Omuwanika wa Buganda Owekitiibwa Robert Wagwa Nsibirwa ku Kkanisa ya All saints Kampala, bw’abadde yeetabye mu kusaba okw’okwebaza Katonda olw’obulamu bwa taata wa Ssaabalabirizi.
Omukulembeze w’eggwanga Yoweri Museveni mu bubaka obumusomeddwa omumyuka we Jesca Alupo, naye asaasidde Ssaabalabirizi olwokufa kwa taata we gw’agambye nti agasse ettoffaali ddene ku ggwanga.
Ku lw’olukiiko olutaba enzikiriza mu ggwanga Akulira enzikiriza ya ba Orthodox Metropolitan Jeronymous Muzeeyi, asabye Ssaabalabirizi okusigala nga munywevu .
Ssaabalabirizi w’e Kkanisa ya Uganda Samuel Kazimba Mugalu yeebazizza bonna ababeereddewo taata waabwe emyaka egisoba mu 12 gyamaze nga Mulwadde.
Akulembeddemu okubuulira, Omulabirizi omubeezi ow’obulabirizi bwa Kampala Rev Canon Fredrick Jackson Bbaalwa asabye banna Uganda obutaggwamu ssuubi wadde ng’eggwanga lijjudde ebisomooza bingi.
Okusaba okwo kwetabiddwako Nnaabagereka Sylivia Nagginda n’abebitiibwa abalala okuva e Mengo, abakungu okuva mu government eya wakati, ba prime minister abaawummula, ababaka ba Parliament n’abantu abalala bangi.
Bisakiddwa: Ssekajjiijja Augustus
