Eklezia Katolika mu Uganda ejaguzza bwegiweze emyaka 146 kasookedde ekitambiro ky’Emmisa ekyasooka mu Uganda, kiyimbibwa e Nnabulaga, ekisaangibwa mu gombolola ye Lubaga mu Kampala.
Emmisa eno ejjukirwa, nga mwemwasooka okulagibwa akabonero ak’omubiri n’obusaayi gwa Kristu aka Ukaristia eyasooka mu Uganda, abakristu nebatandika okusembera ku meeza entukuvu, era nga mmisa eno yayimbibwa Omuminsani Ppere Simeon Lourdel Mapeera nga 25 June, 1879 nga waayise emyezi 4 nga bagobye mu Uganda, baatuuka nga 17 February 1879.
Bw’abadde akulembeddemu ekitambiro kya Mmisa ey’okujaguza emyaka 146 egy’Emmisa eyasooka mu Uganda e Nabulagala Mapeera, Vicar General owookubiri ow’essaza ekkulu erya Kampala Rev Msgr. Gerald Kalumba asabye abazadde n’abantu ba Katonda okunnyikira mu kukkiriza kwabwe n’abaana babawe babawe omusingi omugumu mu kukkiriza.
Agambye nti Ukaristia y’ensibuko y’okukkiriza kw’Abakatuliki okuviira ddala ku kiragiro kya Yezu bweyeewaayo nga Ssaddaaka y’ebibi by’abantu.
Asabye abakyalina ebibalemesa okufuna Omukama mu Ssaakramentu lya Ukaristia okubikolako bagabane ku kijjulo ky’Omukama, era Kristu abeerere ddala mu maka gaabwe.
Msgr. Kalumba asabye bannabyabufuzi okuwa abalonzi baabwe ekitiibwa nabo okukyewa naddala mu kiseera kino nga banoonya obululu, olwo babeere abakulembeze abaleeta essuubi eri abo bebakulembera.
Mu mmisa eno abaana 264 bafunye Kkomunyo esooka mu Ssaakramentu lya Ukalisitia.
Emmisa eno yeetabiddwako Abasaaserdooti okuva mu bibiina eby’enjawulo naddala ekya Missionaries of Africa abaakazibwako erya White Fathers n’abalala.
Aba Denary y’e Bwaise omuli ebigo nga Nnaakulabye, Nnabulagala, Bwayise, Kananya n’ebirala bebakulembeddemu enteekateeka z’omwaka guno 2025.
Bisakiddwa: Kamulegeya Achileo K
