Leero ennaku z’omwezi 12 May,2025, giweza emyaka 12 beddu, bukyanga Ssaabasajja Kabaka Ronald Muwenda Mutebi II asiima nga 12 May, 2013 naayatula erinnya lya Charles Peter Mayiga naamukwasa Ddamula okubeera Katikkiro ow’okuttaano ku Mulembe Omutebi.
Katikkiro Charles Peter Mayiga yadda mu bigere bya Owek. John Baptist Walusimbi.
Mu myaka gino 12, Katikkiro Charles Peter Mayiga yalambika enkola ey’omulembe omuggya, etambulira ku Nsonga Ssemasonga 5 ezaayisibwa Olukiiko lwa Buganda;
1.Okukuuma Okunyweza n’okutaasa Nnamulondo
2.Okugabana obuyinza mu nkola ya Federo
3.Okukuuma ettaka n’ensalo za Buganda
4.Okukola obutaweera
5.Okukuuma Obumu
Mu nteekateeka zino, Katikkiro akuumye ekitiibwa kya Namulondo omuli okuddaabiriza embiri omuli olwe Bamunaniika, olwe Kireka, n’olwenkoni.
Enkola y’e “Ettoffaali”; Katikkiro yatandikira kukulambula amasaza gonna agali ku lukalu ne ku mazzi, agali mu Uganda n’ebweru, n’ekigendererwa eky’okumanya embeera y’abantu ba Ssaabasajja mwebawangaalira n’okubategeeza agafa embuga.
Mu kulmbula kuno abantu ba Kabaka baamutikkanga ensimbi ezaatuumibwa Ettoffaali, era ng’ensimbi zino mwemwava okumaliriza ekizimbe Masengere.
Okuzzaawo Amasiro ge Kasubi n’ebifo eby’Ennono ebirala
Mu nkola y’ettaffaali, Obuganda bwasonda ensimbi ez’okuzzaawo amasiro g’e Kasubi agaali gaateekerwa omuliro mu 2010.
Katikkiro azze akyogera lunye nti omulimu gw’okuzaawo amasiro gukolebwa mu nkola egoberera ennono n’obulombolombo.
Ekitiibwa kya Buganda kyongedde okututumuka nga Abagenyi eb’enkizo omuli abakulembeze b’Ennono , Baanadini , Banabyabufuzi, ebitongole byobwanakyeewa ne government naabagenyi bangi bakiise embuga.
Mu kisaawe ky’ebyobulamu Katikkiro abadde musaale mu lutalo lw’okulwanyisa akawuka akaleeta mukenenya ng’akubiriza abantu okwekebeza n’okubakunga okwenyigira mu ntekateeka omuli emisinde gy’amazaalibwa ga Kabaka .
Obwakabaka buzimbye Amalwaliro okuli e Busimbi mu Singo , e Mukungwe mu Buddu , e Nsangi mu Busiro ,e Kalasa mu Bulemeezi saako e Nyenga mu Kyaggwe okuwa abantu ba Kabaka obujanjabi obusokerwaako obwomutindo era waliwo enkolagana wakati wobwakabaka ne Ddwaliro lye Mengo.
Mu by’obulimi Katikkiro Charles Peter Mayiga wakujjukirwa nnyo olw’okuzuukusa ekirime ky’Emmwaanyi okuyita mu Mwaanyi Terimba, era abalimi baali bazivudeko nga bazze ku bilime ebilala nga gyebuvuddeko Ssabasajja yasiima Amasaza negaweebwa Tractor okutumbula ebyobulimi.
Mu ntekateeka yeemu obwakabaka busse omukago ne Kampuni yebigimusa eya Grain Pulse okuzza obugimu mu ttaka , Kampuni ya Akvo International egenda okukwasizaako abalimi okufuna ebyuuma ebifukirira ku bbeeyi ensamusaamu ate nga byamulembe, nga obwakabaka bukolaganira wamu ne bank ezenjawulo okuli Stanbic Bank, Equity Bank ne Exim Bank okuwola abalimi nebeefunira ebyuma ebifukirira ebirime.
Eby’enjigiriza by’ongeddwamu amaanyi nga Ssetendekero wa Muteesa I Royal University yafuna Charter, eby’emikono ku Buganda Royal Insititute ne Bbowa Vocational biteereddwako essira , saako okuzimba amasomero ga nasale ku Mbuga z’Amasaza gonna n’ebirala.
Abantu ebenjawulo bayozayozezza Katikkiro Charles Peter Mayiga okuweza emyaaka 12 nga akutte Ddamula.
Katikkiro yebazizza Abakiise mu Lukiiko lwabuganda , baminisita , Abakulira ebitongole nabantu abalala abamukwatiddeko mu buwereeza.
Abantu byebogera ku buweereza bwa Katikkiro
Hope Mukasa agamba nti mumyaaka 12 nga Charles Peter Mayiga ye Katikkiro ,ekitiibwa kya Buganda kyeyongedde okututumuka.
Sseriiso Robert munywaanyi wa Katikkiro Charles Peter Mayiga, amwebazizza olw’okulemera kunsonga neekyo kyakilirizaamu nga kimuyambye nnyo okutukiriza obuvunanyibwa bwa Katikkiro.
Moses Luwangula nga waluganda lwa Katikkiro Charles Peter Mayiga amwebazizza nnyo olwokukukuuma Obuganda nokubukunga mu kuzimba obwakabaka.
Jim Sseremba eyasikira Kitaawe wa Katkkiro agamba nti Kalabyonna mu myaka 12 nga akutte Ddamula atumbudde ekitiibwa kya Namulondo ngayita mukusosowaza obuwanwa.
Lubega Andrew Mulindwa Kojja wa Katikkiro amutenderezza nnyo olwobumalirivu nokulemera kunsonga wakati mu kusomozebwa.
Bwanamukulu w’ekigo kya St Joseph Catholic Parish Lweza Rev Fr Emmanuel Ssewannyana agamba nti myaka 12 egya Katkkiro Charles Peter Mayiga gyabibala eri Obuganda era bamwenyumirizaamu ng’omukristu ategulumiza.
Bikuηaanyiziddwa: Ssebuliba Julius ne Kato Denis
