Emikolo gy’okujaguza emyaka 60 bukyanga abajulizi ba Uganda balaangirirwa mu lubu lw’abatuukirivu gitegekeddwa ku kereziya ya St. Peter’s Basilica e Vatican.
Gikulembeddwamu Peter Cardinal Turkson, nga kati ye Chancellor w’ettendekero lya Pontifical Academy for Sciences era omu ku babaka ba Paapa Francis.
Peter Cardinal Turkson, omubaka wa Pope Francis, ajjukizza abafirika okuzimbira ku nteekateeka yaabajulizi okwetukuza, okwolesa obwerufu, n’obugunjufu n’enfuga ya demokulaasiya eri bannaabwe.
Cardinal Turkson avumiridde enguzi esusse mu Uganda, era anokoddeyo n’omujulizi Charles Lwanga, gwagambye nti ku myaka emito gyeyalina yaasobola okubeera oluyungo wakati w’abaana, abavubuka n’abakadde.
Ku mukolo guno President Yoweri Kaguta Tibuhaburwa Museveni atenderezza abakulembeze b’enzikiriza ezisuuta Kristu, olw’okulangirira abajulizi ba Uganda mu lubu lw’abeesiimi ekiyambako okutumbula ebyenfuna bya Uganda kati emyaka 60 miramba.
President Museveni bino abitadde mu bubaka bwatisse omumyuka wa sipiika wa parliament ya Uganda, Thomas Tayebwa.
President agambye nti bukya abajulizi ba Uganda balangirirwa mu beesiimi, kiyambeko okusitula ebyenfuna nebyafaayo bya Uganda, ebyenjigiriza, n’ennono.
President Museveni agamba nti ediini eyaleetebwa abaminsani, era yayambako okukyusa endowooza zaabantu ng’okufumba ebyokulya olw’okutya obuwuka.
Apostolic Nuncio wa Uganda, H.E. ArchBishop Luigi Bianco, agambye nti banna Uganda nabakiriza basaanye okutwala ensonga z’abajulizi ngekyekitiibwa n’okubalabirako.
Emmanuel Cardinal Wamala, atenderezza abajulizi ba Uganda nti baaviirako ekitangaala ekyayakira ensi yonna eky’abazira ab’ekyokulabirako.
Bishop Joseph Antony Zziwa, ssentebe w’olukiiko lwabepisikoopi mu Uganda olwa Uganda Episcopal Conference era omusumba w’essaza lya Kiyinda-Mityana, mu bubakabwe obumusomeddwa omusumba w’essaza lya Mbarara, Lambert Bainomugisha, agambye nti abajulizi ba Uganda kyakulabirako kinene eri abakiriza n’okusiimba ensigo y’obukkiriza okwongera okubukala wonna.
Omubaka wa Uganda e Vatican, Stephen Mubiru, ne Ssabasumba w’essaza ekkulu erya Kampala, Paul Ssemogerere, bwongedde okukaatiriza ku bukulu n’obuvumu obwayolesebwa abajulizi mu kufiirira eddiini.
Omukolo guno gwetabiddwako bannabyabufuzi abagundiivu mu Uganda, ba minister n’abawereza abalala.
Abajulizi ba Uganda bali 45 abakatoliki n’abakulisitaayo.
Abajulizi bano kuliko abakatuliki 22 nabakulisitaayo 23.
Abajulizi abakatuliki baalangirirwa mu lubu lw’abatuukirivu mu mwaka gwa 1964 mu biseera bya Paapa Paul VI.
Baattibwa ku biragiro bya Ssekabaka Mwanga II, wakati wa 1885 ne 1887 wadde nga kawefube w’okubalangirira mu batuukirivu yatandikibwako mu 1915.
Ekifo kye Namugongo, abajulizi webattirwa kyafuuka kyabulambuzi ddala, era buli mwaka abantu nkumi nankumi, beesomba okulamaga e Namugongo ku bijjukizo by’ombiriri ekyabakulisitaayo naaba katuliki e Bulooli.
Bisakiddwa: Ddungu Davis