President wa Uganda Gen Yoweri Kaguta Museveni Tibuhaburwa, alabudde ku bakulembeze abakyenyigira mu bikolwa eby’obulyi bw’enguzi,okusanyaawo entobazi, okusosola mu mawanga, langi n’ekikula ky’abantu nti bebaviirako ebizibu ebiremesa zi government okutuukiruza obuvunaanyizibwa bwazo, nookukuumira amawanga ga Africa emabega.
President Museveni abadde mu maka g’obwa president e Ntebbe, mukwogerako eri eggwanga, ku nsonga ez’enkizo wakati mu kwetegekera ameefuga ga Uganda agomulundi ogwe 61.
Museveni yeweze okuggalira abakozi ba government bonna mu bitundu omuzze mulabikira ebikolwa eby’okusanyaawo entobazi, ebibira,saako obutonde bwensi obulala ng’ abakozi ba government besuuliddeyo gwa naggamba.
Agambye nti bagenda okusooka okukwata kuliko Parish Chiefs, Giso,CAO RDC n’abakozi ba government abalala olw’okulagajjalira eggwanga, ng’abantu basanyaawo obutonde mu bitundu byabwe.
Wabula President ategezezza nti government egenda kuliyirira abalimi b’omuceere mu bitundu bye Busoga, Bukedi ne Kigezi nti kubanga bangi kubano baali baalambikibwa mu nteekateka za government omuli eya Kibimba Rice Scheme, okulima omuceere mu ntobazi.
Museveni era ategezezza nti government egenda kussa amaanyi mu kuwagira emirimu gy’abantu ssekinoomu mu gwanga omuli ba musiga nsimbi abava mu mawanga ge bweru saako bamusiga nsimbi ab’omunda mu gwanga, nti kubanga bano bebasobola okuyitimusa amangu ebyenfuna by’eggwanga okusinga government.
Ku nsonga ey’obutale Museven ategezezza nti banna Uganda webatuuse tebakyasobola kukozesa bintu byonna ebikolebwa mu makolero agazimbiddwa mu ggwanga, nga kati waliwo obwetaavu okunoonya n’okuperereza obutale mu mawanga agatuliraanye abantu okusobola okutundayo ebintu byabwe.
Asabye abantu okweyambisa obukiiko bwa State house obutamba okulwanyisa enguzi n’akakuuma ba musigansimbi.
Museveni azeemu okukikaatiriza nti tagenda ku kiriza muntu yenna ku tabangula mirembe ejiriwo mu Uganda.
Agambye nti embeera eri mu mawanga amalala agakoseddwa entalo nti egakosezza nnyo, eviiriddeko n’abantu baago okuddukira mu buwangaanguse.
Uganda yafuna obwetwaze nga 09 October,1962 kati giweze emyaka 61 bukya, Uganda efuna obwetwaze.
Emikolo emikulu egy’omwaka guno 2023 egy’okukuza olunaku luno gyakukwatibwa mu kibuga Kitgum mu bukiika kkono bwa Uganda.
Bisakiddwa: Ddungu Davis ne Ssebuliba William