Omuteebi Karim Ndugwa ayanjuddwa mu club ya Vipers FC, mu kawefube w’okuggumiza tiimu enavuganya obulungi mu mpaka za Africa eza CAF Champions league, ate ne mu liigi ya babinywera eya Uganda Premier League season eno.
Karim Ndugwa ayanjuliddwa abawagizi ba club ya Vipers ku kisaawe kya club eno ekya St Mary’s Kitende, era atadde omukono ku ndagaano ya myaka 2 ng’abacangira endiba.
Ndugwa afuuse omuzannyi ow’okubiri Vipers beyakagula mu katale kano aka January, nga baasoose kugula Martin Kizza ku ndagaano ya myaka 2.
Karim Ndugwa avudde mu club ya BUL gy’abadde yegattako mu January 2022, era n’abayamba n’okubawangulira ekikopo kya Uganda Cup.
Karim Ndugwa era azannyidde club okuli Villa Jogo Salongo, URA, Express FC mukwano gw’abangi, Wakiso Giants, Victors FC, Mbarara City, AFC Leopards eya Kenya, Horseed eya Somalia n’endala.
Bisakiddwa: Issah Kimbugwe
