Ssaabasumba w’essaza ekkulu erya Kampala Paul Ssemogerere ayagala government mu kaseera kano ak’ennaku enkulu n’okumalako omwaka eddiremu era eyimbule abaasibwa olw’ebyobufuzi badde mu bantu babwe.
Bino abisabidde mu bubaka bwe obwa Ssekukkulu n’okumalako omwaka 2023 bw’aweeredde ku lutikko e Lubaga.
Ssaabasumba agambye nti banna Uganda bangi bavundira mu makomera awatali kufuna bwenkanya mu kkooti naddala abo abaasibwa olw’ebyobufuzi bagamba nti kyandibadde kirungi nebateebwa
Ssaabasumba agambye nti newankubadde omwaka guno 2023, gubadde yadde yaddeko, waliwo okusoomoozebwa banna Uganda kwebasanze naddala okutyoboola eddembe ly’obuntu n’okusiba abantu ekyeyonoonero, bwatyo n’asaba wabeewo okunoonyereza ku bumenyi bw’amateeka n’obwenkanya bwolesebwe, abantu beeyagalire mu nsi yabwe.
Mu ngeri eyenjawulo Ssaabasumba yebazizza abakulembeze n’abebyokwerinda olw’okukola obutaweera okutebenkeza eggwanga n’abasaba bongeremu amaanyi.
Ssaabasumba asabye banna Uganda bannyikize empagi okuli; okwagalana, essuubi, emirembe n’okutabagana, okukuuma obutonde bw’ensi, okwezza obuggya mu mwoyo n’okukkiriza wamu n’okuyamba abali mu bwetaavu n’abaasuulwa awo ettayo.
Ku nsonga y’okudiibuuda ensimbi y’omuwi w’omusolo, Ssaabasumba yennyamidde ku butali bwenkanya ku nsonga eno n’asaba wabeewo ekikolebwa.
Abadde ayanukula ku ky’abaaliko ba sipiika ba Parliament abaaweereddwa kapyata w’emmotoka n’agamba nti Parliament asaana ekitunulemu banna Uganda bonna baganyulwe kyenkanyi.
Ayagalizza banna Uganda amazaalibwa ga Yezu Kristu ag’essanyu n’omwaka omuggya 2024 ogw’emirembe.
Bisakiddwa: Kamulegeya Achileo K
