Ssaabasajja Kabaka Ronald Muwenda Mutebi II ayagalizza abantube mu Buganda ne mu nsi yonna amazaalibwa g’Omulokozi amalungi, n’asiima abakulembeze ku mitendera gyonna olw’eddoboozi eryawamu lyeboogeza ku nsonga za Buganda.
Omutanda obubaka bwe abutisse Omulangira David Kintu Wassajja, abusomedde mu Lutikko e Lubaga mu mmisa y’Amazaalibwa g’Omwana wa Katonda.
Ssaabasajja agambye nti abakulembeze basanye obutemotya mu nsonga za Buganda kko n’Okulwanirira eddembe ly’Obuntu obutatyoboolwa.
Ssaabasajja alagidde government ekole ekisoboka etaase abalimi mu biti ebyenjawulo baganyulwe mu ku Mirimu gyebakola, nga ebakwasizaako okufuna obutale Obugasa.
![](https://cbsfm.ug/wp-content/uploads/2023/12/20231225_233542-300x165.jpg)
Missa ekulembeddwamu Ssaabasumba w’essaza ekkulu erye Kampala Paul Ssemogerere alabudde ku bikolwa ebitali byakisa ebimaamidde ensi eno ,omuli okulya enguzi, abasomesa abakaka abayizi omukwano nebabawa Obubonero bwebatakoleredde mu mazima n’ebirala.
Ssaabasumba era yennyamidde olw’abamunku bakulembeze abasusse okweyagaliza nga bagujubanira buli kintu.
![](https://cbsfm.ug/wp-content/uploads/2023/12/Screenshot_20231225_230641_X-300x176.jpg)
Minister omubeezi ow’ebyenjigiriza ebya waggulu mu gavumenti eyawakati Owek Dr JC Muyingo, asabye abazadde okukuuma Abaana obutiribiri, kyokka mungeri eyenjawulo naabasaba obutabaggya mu masomero.
Ku lutikko ya St Paul e Namirembe, okusaba kukulembeddwamu omulabirizi owoomukaaga Rt Rev Moses Banja, ngayambibwako Dean wa lutikko Ssalongo Jonathan Kisawuzi.
Bwabadde akulembeddemu okubuulira omulabirizi Banja, yenyamidde nnyo olw’enguzi esusse mu Uganda, ekibba ddagala mu malwaliro ekiviriddeko ebyobulamu bya Uganda okugootaana nobuweereza okukaluba eri omuntu waabulijjo.
Obubaka obuvumirira enguzi esusse, enguudo ezijjudde ebinnya, ebbula ly’emirimu mu bavubuka, okukozesa ebiragalagala, ekiwamba bantu, ekibba ttaka n’ebirala okutwalira awamu byebimu ku byefuze obubaka bwa bannaddiini mu masinzizo agenjawulo ku ssekukkulu y’amazaalibwa ga Yesu Kristo agoomwaka guno 2023.
Okusaba e Namirembe kwetabiddwamu Nnabagereka Sylivia Naginda, Namasole Damalie Rebecca Nantongo Muganzi, ssabaganzi Emmanuel Ssekitooleko Ndiwulira, Omukubiriza woolukiiko lwa Buganda Patrick Luwagga Mugumbule, Jjajja Nakirembe Eng. Allan Waliggo, omubaka wa Busiro East Owek Medard Lubega Ssegona Akalyamaggwa, banna diini, abawereza mu kkanisa, banna byabufuzi, abantu baabulijjo n’abalala.#