Ssaabasajja Kabaka Ronald Muwenda Mutebi II asiimye ekizimbe galikwooleka ekisomerwamu Abayizi Abasawo kibbulwe mu Mannya ge, Kabaka Ronald Muwenda Mutebi II Complex , ekisangibwa ku ttendekero ly’Abasawo erya International Paramedical and Nursing school Maya mu Busiro mu district ye Wakiso.
Empologoma Obubaka bw’Okusiima kuno ebutisse Kamalabyonna wa Buganda Charles Peter Mayiga, bwabadde yeetabye ku Matikira g’Abasawo ku ttendekero lino ag’Omulundi ogwokutaano, agabadde e Maya mu district ye Wakiso, ng’abayizi abakunukkiriza mu 800 bebatikkiddwa.
Ssemunywa asiimye omutandisi w’Ettendekero ly’Abasawo International Paramedical and Nursing school Maya, Dr. Grace Steven Sseruyange nga ye mumyuuka asooka owa Ssebwana, olw’okutumbula Ebyobulamu, era naasaba Omukama Katonda ayambe bonna abagenda okusomeramu babe bankizo eri Ensi eno.
Katikkiro asabye abatikkiddwa obutanyooma Mirimu, bakole nga tebesaasira ,era babe n’Omukwano ogufaayo eri abalwadde.
Omukolo guno gutandise n’ekitabiro ky’emmisa eyimbiddwa Msgr. Lawrence Ssemusu.
Minister w’Ebyobulamu ,ebyenjigiriza era nga yavunaanyizibwa ku yafeesi ya Nnaabagereka Owek Natake Cotilda Kikomeko, nga akiikiriddwa Minister wa cabinet, Olukiiko n’ensonga ez’Enkizo mu yafeesi ya Katikkiro Owek Noah Kiyimba, yebazizza ettendekero lya International Paramamedical okuwagira entekateeka z’Obwakabaka nga litumbula Ebyobulamu n’Ebyenjigiriza.
Omutandisi w’Ettendekero lya International Paramamedical and Nursing School Maya era nga ye mumyuuka asooka owa Ssebwaana Owek Dr Grace Sseruyange, yebazizza abazadde ne bannamikago bonna okubakwasizaako, mungeri yeemu nasuubiza nti ettendekero eryo lyakugenda mu maaso okusakira abantu ba Buganda ne Uganda.
Ettendekero lino era liwezezza emyaka 10 bukyanga litandikibwawo.
Bisakiddwa: Kato Denis
