Ssaabasajja Kabaka Ronald Muwenda Mutebi II asiimye naggulawo Omwaka 2026, nga ali wamu n’Abantube mu Lubiri e Mengo, mu Nkuuka Bwaguuga 2025 ekubyeko bugule.
Ssaabasajja asiimye abantu be Bonna olwÓkuwagira nga Enkuuka ya CBS, kuba yentabiro yÓmwoyo gwa Buganda Ogutafa.
Empologoma yebazizza Abamegganyi bonna abeetabye mu Ntanda ya Buganda,abantu baayo mwebavuganyiza mu Lulimi Oluganda,era neeragira Obumu obwooleseddwa bweyongere.
Liisolyampungu ajjukizza Obuganda nti Omuzungu weyajja mu Buganda yatendereza nnyo empisa n’ennono z’Abaganda n’obukulembeze bw’ebika n’olulimi ebyabalaga omutendera gw’obugunjufu Omuganda kweyali.
Kalemakansinjo alagidde bino okukuumibwa obutiribiri n’okubisomesa abaana kubanga byebizimba obumu n’obugunjufu.
Nnyininsi Musota agumizza Obuganda ne Uganda okusigala nga bali bumu mu buli mbeera.
“Tuddamu okubakubiriza okusigala nga muli bavumu mu buli mbeera yonna n’okujjukira nti; Okwegatta bwe buwanguzi bwaffe, temuggwamu ssuubi, kazigizigi gwe tulimu kaakati ajja kukyuka singa ffenna tusigala ku mulamwa.
Ssaabasajja abadde wamu ne Nnaabagereka Sylvia Najjinda omulangira Ssemakookiro n’omumbejja Katrina Ssangalyambogo, asiimye naatikkira Abazira mu Bazira ba CBS 2025 omubadde Busuulwa Joseph ow’Entanda Diaspora Omuzira mu Bazira owebweru era namukwaasa Ekyapa ky’Ettaka.
Oluvannyuma era Empologoma esiimye nekwasa Omuzira mu Bazira Basajja Mivule John muzzukuku wa Mugema, era Ono naye akwaasiddwa Ekyaapa ky’Ettaka n’Obukadde 5, ng’ettaka lino MTN eritaddemu ensimbi.
Katikkiro wa Buganda Charles Peter Mayiga yebazizza Abantu ba Kabaka olwÓkuteeka nga mu nkola ebiragiro bya Nnyininsi omuli Okulwanyisa Mukenenya, Okulima Emwanyi nÉntekateeka endala ezizza Buganda ku Ntikko.
Ssenkulu wa Radio ya Kabaka CBS etegese Enkuuka Bwaguuga Omuk.Michael Kawooya Mwebe, ategeezezza Ssemunywa nti Obuwanguzi Radio ye bwonna bwezze etuukako buvudde ku mpeereza yaayo ennungi eri Eggwanga, ne bannamukago abawa essuubi.
Enkuuka yetabyeko Abalangira n’Abambejja, Katikkiro eyawummula Owek Joseph Mulwaanyammuli Ssemoogerere, ba Jjajja abataka abakulu b’Obusolya abakulembeddwamu Omukubiriza w’Olukiiko lwaabwe Namwama Augustine Kizito ,Ssabaganzi Ssalongo Emmanuel Ssekitooleko, Ababaka ba Kabaka emitala wa Mayanja nÉbweru wa Buganda, ababaka ba parliament.
Enkuuka bwaguuga 2025 ewagiddwa MTN Uganda, MTN MOMO, Nature creates ventures, Movit, Nivana Water, Operation wealth creation, BBS Terefayina , CBS, NIRA abakoze ogwokuwandiisa Abantu okufuna Endagamuntu nÁbavujjirizi abalala bangi.
Abantu bÓmutanda bongedde okulaga Amaanyi bwebeyiye mu bungi mu Nkuuka Bwaguuga, era abantu ba Kabaka olubiri balwamuse nkeera nga 01 January,2026.
Bisakiddwa: Kato Denis
