President wa NUP Kyagulanyi Ssentamu police emugaanye okutuuka e Kamuli – abawagizi ebakubyemu omukka ogubalagala

Police n’abawagizi ba National Unity Platform balidde matereke bw’ebadde eremesa President wa National Unity Platform Robert Kyagulanyi Sentamu okutuuka mu district ye Kamuli ewabadde wategekeddwa olukungaana lw’okukunga abawagizi.

Police etadde emisanvu, n’ebimotoka byayo n’ebikiika mu luguudo wakati mu kitundu kye Buwoolero ku nsalo eyawula Jinia ku Kamuli, okumulemesa okweyongerayo.

Abantu abawerako batuusiddwako ebisago olw’akavuvungano akabaddewo, olw’amasasi agakubiddwa mu bbanga n’omukka ogubakagala okugumbula ebikumi n’ebikumi by’abawagizi ababadde balemeddeko.

Mercy Walukamba akulira eby’okulonda mu NUP avumiridde abakuuma ddembe olwokukozesa amaanyi agasusse okutulugunya bana NUP abatabadde nakyakulwanyisa kyonna.

Akulira eby’okukunga banna NUP mu buvanjuba bwe ggwanga Kaluuya Andrew agamba nti abantu babwe bakoseddwa n’ebidduka byonoonebwa mu kuvuvungano akabaddewo.

Kaluuya agambye nti wadde nga babalemesezza okweyongerayo e Kamuli basazeewo okukuuma emirembe balinde olunaku olw’enkya bagende mu district ye Bugiri.

Amasasi n’omukka ogubalagala byasoose kumyookera ku lutindo lwe Jinja, police bweyaggadde olutindo luno okuziyiza abantu ababadde babemberedde ku mmotoka, ku pikipiki nga bawerekera Kyagulanyi, abadde abakulembeddemu, wamu n’akulira oludda oluwabula government mu parliament ne Ssaabawandiisi wa NUP David Lewis Lubongoya.

Ab’ebyokwerinda obwedda batadde zi kabangali zabwe ku lutindo lwe Jinja era Kyagulanyi ne banne babadde bakatuuka ku lutindo luno, omukka ogubalagala gutandikiddewo okumyooka.

Ssenyonyi oluvanyuma lw’okuwanyisiganya ebisongovu ne police nga yemulugunya olw’okubakubamu omukka ogubalagala ng’ate babadde batambula mu mirembe, emaze n’ekkiriza Kyagulanyi nebanen nebayita ku lutindo neboolekera e Kamuli, wabula tebaganyizza kutuuka mu kifo ewabadde wagenda okubeera olukungaana.

Wabula Kyagulanyi ssentamu abasuubizza nti bakugenda mu maaso n’enteekateeka zabwe ez’okusaaggulira ekibiina kyabwe obuwagizi okwetoloola eggwanga lyonna.