President wa Uganda Yoweri Kaguta Museveni Tibuhaburwa atadde omukono ku mateeka 8 agaayisibwa parliament gyebuvuddeko, negafuuka amateeka amajjuvu era nga galinze okukubwa mu kyapa kyeggwanga gatandiise okussibwa mu nkola.
Okusinziira ku bubaka obufulumiziddwa amaka gobwa president ,amateeka gano kuliko erya The National Drug and Health Products Authority Act, 2026 government mweyayita okuggyawo ekitongole ekirondoola omutindo gweddagala mu ggwanga ki National Drug Authority ekyateekebwawo etteeka lya 1993, nga mu tteeka lino kyasikiziddwa ekitongole ki National Drug and Health Products Authority, ekigenda okuvunaanyizibwa ku kulondoola omutindo gw’eddagala lyabantu, ebisolo, ebyuma ebikozesebwa mu malwaliro n’obujanjabi obulala, ebizigo by’ensusu, emmere erimu ebiriisa n’eddagala lyekinnansi..
Etteeka eddala president lyataddeko omukono lyerya the Energy Efficiency and Conservation Act, 2026 saako etteeka lya the Non-Performing Assets Recovery Trust (Repeal) Act, 2024 eryagyawo ekitongole kino obuyinza nebuzimba eri ministry y’ebyensimbi.
Etteeka eddagala lye lya, the Employment (Amendment) Act, 2025 erigendereramu okukuuma nokunyweeza eddembe ly’abakozi bawaka abamanyiddwanga bayaaya nebankuba kyeyo, bannauganda bakolera mu mawanga amalala.
The Forensic and Scientific Analytical Services Act, 2026 nakyo omukulembeze weggwanga alitaddeko omukono.
Etteeka lino erya the Forensics And Scientific Analytical Services Bill,2025 liwa obuyinza n’obuvunaanyizibwa eri ekitongole ki Directorate of government analytical laboratory okukwanaganya, okwekebeggya n’okuwa eggwanga amawulire agakwata ku butwa erimanyiddwanga the National Poison Information Centre, awamu n’okuvunaanyizibwa ku kulondoola amakebeggyero g’endaga butonde gonna mu ggwanga.
Etteeka lya The Copyright and Neighbouring Rights (Amendment) Act, 2026 eriruηamya
ebiyiiye omuli ennyimba, emizannyo, ebitontome, Katemba, n’ebintu ebirala ebiriko obwannannyini, nalyo president alitaddeko omukono.#
