Parliament egobye ennongosereza mu tteeka ly’omusolo gwa exercise Duty ezibadde zanjuddwa omubaka wa Kampala Central Mohammed Nsereko okukendeeza omusolo ogugibwa ku mafuta.
Ekiteeso kino kibadde kigendereddwamu okukendeeza ebbeeyi y’amafuta ey’ekanamye, eviiriddeko n’ebbeeyi y’ebyamaguzi ebirala okulinnya.
Mu kiseera kino ebbeeyi y’amafuta ga diesel eri wakati we 5200 ne 5350 buli liita, songa ebeeyi yamafuta ka petro eri wakati we 5400 ne 5500 buli liita.
Mohammed Nsereko abadde ayagala omusolo ogwa shillings 1130 government gwefuna ku liita y’qmafuta ga diesel gukendezebweko shillings 600, gudde ku shillings 530 buli liita.
Omusolo ku mafuta ga petrol omubaka Nsereko abadde ayagala gukendereko shillings 750, okuva ku shillings 1,450 government gwesolooza ku buli liita, okudda ku shillings 750 buli liita.
Wabula omubaka wa Sheema Municipality Dickson Kateshumbwa agambye nti singa ekiteeso kino kiyisibwa, eggwanga ligenda kufiirwa omusolo gwa trillion 1 n’obuwumbi 500, songa government ensimbi zokuddukanya eggwanga ezinoonya tezirabako.
Omubaka omukyala owa district ye Napak Faith Nakut, n’omubaka Geofrey Ekanya owa Tororo North bagambye nti tewali kunoonyereza kwonna kwali kukoleddwa, okulaga nti singa omusolo ku mafuta gukendezebwa, n’ebbeeyi yaago yakukendeerako.
Sipiika wa parliament Anita Among agambye nti ministry y’ensimbi esooke yetegereze kalonda yenna akwata ku musolo guno, balyoke basalewo ekyokukola.
Minister omubeezi ow’ebyensimbi Henry Musaasizi agambye nti ennongosereza yokukendeeza omusolo ku mafuta yetaaga okwongera okwetegerezebwa ennyo, era asuubiza nti mu bbanga lyamyezi 3 bajja kuddayo mu parliament bagitegeeze kyebanaaba basazeewo.
Parliament yeemu ezizaawo omusolo gwa bitundu 20% ogwali gwaggibwa ku sweets, Chewing gum ne chocolate.
