Abakugu mu kujjanjaba endwadde zeemitima, bagamba nti okukola dduyiro ly’ekkubo erigenda okutaasa banna Uganda endwadde ezitasiigibwa naddala ezo ezikosa omutima, omugejjo, kookolo nendala.
Dr. John Omagino, ssenkulu w’eddwaliro ekkuli erijjanjaba emitima erya Uganda Heart Institute, (UHI), asinzidde mu bimuli bya Meeya w’Entebbe ewategekeddwa ebikujjuko byolunaku lw’okwefumiitiriza ku ndwadde z’emitima, naasaba government okuyisa amateeka agakaka abantu, kampuni n’ebitongole okukola dduyiro, okwewala omugejjo n’ekizibu ky’abantu abakosebwa endwadde ezitasiigibwa.
Dr. Omagino agambye nti kisaanidde naamateeka agatangira amasomero agatalina bifo wakukolera dduyiro obutaweebwa layisinsi kukola, kuba nakino kiviirako endwadde okweyongera mu ggwanga.
Ebiwandiiko by’eddwaliro ekkuli erya Uganda Heart Institute, (UHI), biraga nti abaana akakadde kamu n’emitwalo 60 bebazaalibwa n’ekizibu ky’endwadde zeemitima, ssonga ku buli bantu bana (4), abakulu omu azuulibwamu ekizibu kyekirwadde ky’omutima.
Amyuka akulira eddwaliro lya Uganda Heart Institute, Dr Peter Lwabi, agamba nti banna Uganda ssinga beewala okunywa omwenge ekisusse, okukomonta ssegereeti, ebiragalagala, okulya omunnyo omubisi, okwewala okulya eby’amasafu, sukaali nebiwomerera ebirala bisobola okutangira endwadde z’emitima.
Ebikujjuko eby’okwefumiitiriza endwadde z’emitima bitandise n’okuyisa ekivvulu mu kibuga Ntebe, nga bikulembeddwamu Meeya w’Entebbe, Fabrice Brad Rulinda, asinzidde wano naalabula abakozi naabantu baabulijjo okufaayo wakiri okufissa akadde ka nnaku 2 mu wiiki, okukola dduyiro, okutumbula oba okudduka mu bitundu byabwe okwewala endwadde.
Ssentebe woolukiiko olufuzi olw’eddwaliro ly’emitima, Dr. James Magara, agambye nti mukawefube wookutaasa abantu endwadde zeemitima nokukendeeza kwabo abaddukira ebweru w’eggwanga okufuna obujjanjabi, government ezimba eddwaliro eryebitanda 250 e Naguru, okwongera obujjanjabi mu ggwanga era lyakujjibwako engalo mu mwezi ogwokubiri mu 2027.#
Bisakiddwa: Ddungu Davis
