Obwakabaka bwa Buganda bukuzizza olunaku lw’ebyobulimi n’obwegassi.
Omukolo guyindidde ku mbuga y’essaza Kyaggwe Muggulu e Mukono.
Katikkiro Charles Peter Mayiga bw’abadde ku mukolo guno, asabye abantu ba Kabaka okwongera okwettanira okulima n’addala ekirime ky’emmwanyi okuva mu bwavu.
Mu butongole agguddewo n’omwoleso ogugenda okumala ennaku 5 ku mbuga ye Ssaza.
Katikkiro era atongozza n’emmerezo y’emmwanyi ku mbuga y’essaza Kyaggwe okuyamba abantu ba Kabaka abalimi b’emmwanyi okufuna endokwa ez’omulembe era nga za mutindo.
Omwami wa Kabaka amukulembererako essaza Kyaggwe, Ssekiboobo Eliajah Boogere Mulembya Lubanga agambye nti banna Kyaggwe bettanidde obwegassi, n’asuubiza nti balina n’enteekateeka y’okuggulawo ekibiina kya Kyaggwe CBS POWESA banna Kyaggwe mwebanaayita okutereka n’okwewola beekulaakulanye.
Minisita w’ebyolimi, obwegassi, ebibira ne Bulungibwansi Owek Hajjat Mariam Mayanja Nkalubo asabye banna Uganda okwongera amaanyi mu nkola z’okukuuma obutonde bwensi.
Omubaka wa Buyikwe South mu parliament Dr Phillip Michael Lulume Bayiga asabye nti enkola z’okukuuma obutonde naddala ebibira zongerwemu amaanyi, kiyambeko mu kugoba ekyeya n’ebbula ly’enkuba eriva mu kusanyaawo ebibira.
Hajji Umaru Ddumba owa Yawe Farmers Association omu ku batakabanira ebyobulimi mu Kyaggwe asabye abateesiteesi b’endokwa okufaayo ennyo ku mutindo gw’endokwa zebaguza abalimi, nti zibeere nga zitukaana n’omutindo baleme kufiirizibwa.
Bisakiddwa: Naluyange Kellen