President wa Uganda Gen.Yoweri Kaguta Tibuhaburwa Museveni, akakasizza nti government egenda kugula ettaka lya yiika 60 mu bitundu bye Migadde mu Wakiso, ezimbeko ekkadiyirizo ly’abazira abayambako okuleeta NRA/NRM mu buyinza mu mwaka gwa 1986 kati emyaka 40 ejiyise.
President Museveni abadde mu maka g’obwa president e Nakasero, ku bikujjuko by’okukuza olunaku lw’abazira olw’omwaka 2026, olumanyiddwa nga Hero’s Day olukuzibwa buli nga 09 June.
Olw’omwaka guno 2026 lukwatiddwa mu nkola eya science nga lwetabiddwako abantu 25 bokka, okubadde bannadiini, ba minister abakwatibwako ensonga, Sipiika wa Parliament, nabakulira ebitongole by’ebyokwerinda.
Minister avunanyizibwa ku nsonga zaakanyigo k’e Luweero, Alice Kaboyo, yayanjulidde president naamutegeeza nti ettaka lyeyamulagira okunoonya kwebanateeka ekkandiyirizo ly’ebikwata ku lutalo lwe Luwero olwaleeta government ye mu buyinza yalifunye ate nga liri kumpi n’ekibuga Kampala.
Minister Alice Kaboyo, ategezezza nti yamaze okukaanya ne nnamwandu weeyaliko governor wa bank ya Uganda enkulu, Prof Emmanuel Mutebire, okubaguza ettaka lyabwe.m erisangibwa e Migadde eriwezaako obugazi bwa yiika 60.
President Museveni kino kimusanyudde era nategeeza nti government yakusasula ettaka eryo bateekeko ekijjukizo kyabazirwanako eky’amaanyi, nekaddiyirizo lyeebyo ebyaliwo mu lutalo olwaleeta NRA/NRM mu buyinza.
President era akakasizza nti basobodde okutuukiriza ebiruubirirwa byonna byebaalina mu kiseera nga batandika okulwanirira enkyukakyuka mu Uganda.
Agambye nti byebaali bataddeko essira okuli ekirooto eky’okuzaawo obutebenkevu neemirembe, ebyenjigiriza, ebyobulamu ebirungi, ebyokwerinda, ebyenfuna, amakubo nebizimbe, nebirala ebyali bidobonkanye babikoze.
President Museveni era agambye nti wakudamu okulondoola ensimbi zeyalagira ziweebwe abalwanyi abamuyambako okuleeta government mu buyinza kuba akooye okuwulira abeemulugunya, so nga yakafulumya obuwumbi obusoba mu 231 mu nteekateeka eno.
Mukusooka ssentebe waabazirwanako, Hajji Ssendugga Ediriisa mu bubaka bwatisse omuyambiwe, Kiggundu Kabandwa, bawakanyizza ekya government okuggyawo enteekateeka y’okujaguza emikolo egyenjawulo okujjako egyediini ng’omuteesiteesi omukulu mu ministry yeebyensimbi bweyalangiridde gyebuvuddeko, ng’emu ku nkola ey’okukendeeza ku nsaasaanya y’ensimbi za government.
Omwaka guno ku bikujjuko bya 2026, tewabaddeewo kugaba midaali nga bwekibadde kibeera emyaka egiyise okuva mu 2001, nti ababadde balina okujifuna tebaleteddwa olw’okutya okusaasana kw’ekirwadde kya Ebola ekiri mu ggwanga.
Bisakiddwa: Ddungu Davis
