Olunaku lw’ensi yonna olw’abakozi 2025, mu Uganda lukwatiddwa mu district ye Nakapiripiriti mu bendobendo lye Karamoja, ku mulamwa ogugamba nti “Okwefumintiriza ku bibala byenkola ya PDM mu kubangawo emirimu awatali kusosola n’okwongeza ku byamaguzi ebifulumizibwa mu butale”.
President wa Uganda Gen. Yoweri Kaguta Tibuhaburwa Museveni, agambye nti government ye eteekateeka okutondawo emirimu ejiwera okwongera okukwasizaako abantu abatalina mirimu ssinga bagondera ebibalagirwa.
Agambye nti eriko enkola zeereseewo mu kuwagira abakozi ‘nokutondawo amakolero n’ebirala.
Alabudde abantu obuteyinulira nnyo ku mirimu gya government gyokka kuba tejimala, nti kubanga government erina emirimu emitwalo 480,000 gyokka ssonga Uganda erina abantu obukadde obusoba mu 20 abagyetaaga.
President Museveni agambye nti abantu ssinga banaagondera enkola government zebateereddewo nga eya PDM, Emyooga n’ebirala bakukyusa obulamu bwabwe.
Agambye nti gavumenti era etadde essira mu kubunyisa amasanyalaze, okukola enguudo, okusobozesa abantu okwewola ku magoba amatono, okuzimba oluguudo lweggali y’omukka, byonna okwongera okufunira banna Uganda emirimu n’okubanguyiza okutuka ku butale.
Minister avunanyizibwa ku kikula kyabantu, Betty Amongi, agambye nti wadde government etaddewo amateeka agayambako abakozi okweyagalira mu mirimu gyabwe, abakozesa abamu bakyagatyoboola n’okunyigiriza abakozi.
Agambye nti baakizudde nga buli mwezi abakozi wakati 3-4 bebafiira ku mirimu, abamu tebaweebwa ndagaano ezibakakasa ku mirimu, ssonga babamu zisazibwamu awatali ku kaanya.
Ku lunaku luno olw’abakozi, Abakozi 61 bebaweereddwa emidaali olw’obuwereza bwabwe obwenjawulo mu bitongole bya government ne mu mirimu egyabwe naye nga jikulakulanya eggwanga, ku lunaku olwabakozi.
Abawereddwa emidaali ku lunaku lwabakozi omwaka guno 2025, kuliko abakyala 16, era abamu ku bafunye emidaali kuliko Steven Kabuye, eyaliko meeya wa municipaali ye Entebbe, Samuel Kaggwa, omusawo omukugu mu district ye Mpigi, Doreen Katusiime omutesiteesi omukulu mu ministry y’ebyobulambuzi, Andrew Gutti eyali omulamuzi mu kooti y’amaggye, Dr Eng Silver Mugisha, ssenkulu weekitongole ky’ebyamazzi ekya National Water and sewage cooperation, Shk Elias Kigozi nabalala.
Maj General George Igumba, bwabadde asoma amanya gaabantu abawereddwa emidaali agambye nti akakiiko akabantu 9 kekeetegerezza amanya gano nekagawa president nakkiriza okubawa emidaala mu buwereza bwabwe.
Bisakiddwa: Ddungu Davis
