Nnaabagereka Sylvia Nnagginda asabye abazadde okusomesa abaana eddembe lyabwe, ate era babayigiriza nookulikuuma.
Nnaabagereka aby’ogeredde mu Lubiri e Mengo bwabadde yeetabye mu Kujaguza olunaku lw’abaana mu Buganda.
Olunaku luno lutambulidde ku mulamwa ogugamba nti Okunnyikiza Obumu n’Okukuuma eddembe ly’abaana okuzza Buganda ku ntikko.
Mu ngeri yeemu Nnaabagereka asabye abaana okwewala okukozesa eddembe lyabwe mu ngeri etyoboola abalala.
Nnaabagereka era asabye abazadde okutumbula Obumu n’okwewala obutabanguko mu Maka kubanga Bulaga abaana ekifaananyi ekibi n’okubateeka mu mbeera ey’okwennyika.
Asabye abaana okufaayo okuzuula nookukuza ebitone byabwe wabula nga n’obuntu bulamu tebabusudde.
Minister wa Buganda owa Bulungi bwa nsi n’ekikula ky’abantu owekitiibwa Mariam Mayanja Nkalubo Nnassejje asabye abazadde okukomya okweyisa mu ngeri etali y’abuvunaanyizibwa mu maaso g’abaana.
Akulira ekitongole ky’abakyala n’abaana mu Kyaggwe era nga y’abadde Ssentebe w’akakiiko akategese omukolo ogwo Nakafu Esther yeebazizza maama Nabagereka olwokulwanirira e ddembe ly’abaana.
Asabye abazadde okuyigiriza abaana okukola emirimu egivaamu ssente kibawonye okugwa mu butego bwa ba ssedduvutto ababalimbalimba n’obusente nebafundikira nga gabafunyisizza embuto n’okubawereba ebirwadde.
Abayizi abetabye ku Mukolo guno nga bakulembeddwamu Nantege Emily okuva ku Ssomero King’s Kids learning Centre Kyaggwe, bagambye nti buvunnaanyizibwa bwa buli muntu okukuuma eddembe lya baana.
Omukolo guno gwetabiddwako ba minister ba Buganda, Ssaabawolerereza wa Buganda Christopher Bwanika, minister w’ebyenjigiriza n’ebyobulamu era ne wofiisi ya Nnaabagereka Owek. Cotilda Nakate Kikomeko, abaami ba Masaza Okubadde Kayima ne Kasujju, Omukubiriza w’olukiiko Lwa bataka abakulu ab’obusolya Nnamwama Kizito Augustine Mutumba abaana okuva mu masomero agenjawulo naabala.
Bisakiddwa: Ssekajjiijja Augustus
