Government ya Uganda ng’eyitta mu ggye lya UPDF ekomezaawo ekibinja ky’abaaliko abayeekera ba Lords Resistance Army abalala 61, okuva mu Central African Republic.
Baaniriziddwa Sabaminister wa Uganda Robina Nabbanja Misafiri,Minister wa Semateeka n’essiga eddamuzi Nobert Mao,Minister w’ebyokwerinda Vicent Bamulangaki Sempijja n’abakungu ba Government z’amawanga amalala 4 okuli South Sudan,Central African Republic, ne DR Congo.
Abayeekera bano bagidde mu kibinja nga bakulembeddwa Robert Kidega.
Ekibinja kino kirimu abasajja 15,abakyaala 14,n’abaana 32 era nga bakkiriziddwa okudda ku butaka, okuva mu bibira bye Mboki mu Central African Republic gyebabadde bekukumye okumala emyaka.
Baaniriziddwa mu butongole ku kabaga akenjawulo akakoleddwa ku kisaawe kye Nnyonyi e Ntebe wakati mu bukuumi obw’amaanyi obutereddwawo eggye ly’eggwanga erya UPDF.
Ssabaminister wa Uganda Robinah Nabbanja agambye nti kano ke kamu ku bubonero obulaga nti bannauganda bagala mirembe,era asuubizza nti abayeekera abavudde mu nsiko bagenda kuyambibwako okutebeenkera mu ggwanga lyabwe
Minister avunanyizibwa ku by’okwerinda Vicent Bamulangaki Sempijja agambye nti okukomyawo babansiko bano tekwabadde kwangu,wabula wabaddewo enkolagana ey’amaanyi eyateekeddwawo wakati wa government ya Uganda nabamu kubabadde bakulira akabinja kano wadde nga mukama wabwe ow’okuntiko Joseph Kony tebamanyi gyali.
Ekibinja kino kisuubirwa okubanga kye kisembyewo okusinziira ku bye banoonyereza n’enkolagana gyebatonzeewo n’amawanga agetolodde ebibira bya Central African Republic
Amyuka omwogezi w’amagye Deo Akiiki ategezezza nti abantu bano bonna 61 batwaliddwa mu nkambi e Migyeera okubudabudibwa nga bwebaakola ku bannabwe abalala abaasooka okuzzibwa.
Bisakiddwa: Kakooza GeorgeWilliam
