Obuwumbi bwa shillingi 3 n’obukadde 573 zezikunganyiziddwa mu misinde gya banna Rotary ejigendereddemu okusonda ensimbi ez’okuzimba ekifo ewajjanjabirwa n’okukalirira abalwadde ba kookolo ku ddwaliro e Nsambya.
Abaddusi abasobye mu mitwalo 6 bebeetabye mu misinde jino egy’omulundi ogwe 14, ejiyindidde mu kisaawe e Kololo n’ebitundu by’eggwanga ebyenjawulo ebirala.
Bwabadde akulembeddemu emisinde gino, Director wa Rotary munsi yonna, era ssentebe w’olukiiko olufuzi olwa kampuni ya Quality Chemicals Ltd, Dr. Emmanuel Katongole, asabye banna Rotary okwongera amaanyi mu kawefube wookuduukirira abantu mu nkola ey’okuwaayo eri enteekateeka nga zino.
Akakasizza nti baagala okulaba ng’ekiruubirirwa kyabwe eky’okumaliriza ekifo ekijjanjababirwamu kookolo e Nsambya nga kijjibwako engalo ng’omwaka 2027 tegunatuuka.
Eyali governor wa Rotary mu Uganda ne Tanzania, Steven Mwanje era eyalina ekirooto kyabantu okudduukirira enteekateeka y’okuzimba ekifo ewajanjabirwa kookolo, agambye nti ensimbi buli mwaka zeyongera nga ezomwaka guno zeekubisizzamu emirundi 2 kwezo ezakuηaanyizibwa omwaka ogwayita.
Mu nteekateeka eno, wabaddewo okuzanya akazanyo kookugaba ekyapa ky’ettaka okuva mu Bakayima Real Estates, era akalulu kasoose kugwa ku Francis Olul, kyokka nebamuyita okumuwa ekyaapa nga yagenze, olwo omukisa negugenda ewa Lynette Najjemba Ddungu.
Ssenkulu wa Bakayima, Kaweesa Kareem, agambye nti kino bakikoze okuddiza ku banna Uganda abaduukiridde Rotary mu kulwanyisa kookolo mu Uganda.
Fabian Kasi, ssenkulu wa Bank ya Centenary abawagidde enteekateeka eno agambye nti obwetaavu bukyali bunene era bakunze abantu okwongera okubakwasizaako ku mulimu guno.
Kampuni ezenjawulo neebitongole bya gavumenti byetabye mu kawefube ono ow’emisinde.
Abaddusi badduse emisinde egya kiro meter e 10, 21 ne 42 okusinziira ku busobozi bw’omuntu, sso nga abalala basigadde mu kisaawe e Kololo nga beekolera dduyiro.
Kookolo zezimu ku ndwadde ezisiinga okukosa banna Uganda, nga mu Uganda kookolo waamabeera, omumwa gwa nnabaana, byebisinga okukosa abakyala sso nga owa Prostate yasinga okukosa abaami.
Bisakiddwa: Ddungu Davis
