Ssaabasajja Kabaka Ronald Muwenda Mutebi II ayozaayozezza Ssaabasumba Paul Ssemogerere, abakristu ne bannaddiini olw’okutuuka ku lunaku, lutikko y’e Lubaga kwejagulizza okuweza emyaka 100 kasookedde etukuzibwa.
Obubaka bwa Nnyinimu Beene busomeddwa Katikkiro wa Buganda Charles Peter Mayiga mu kusaba kw’okujaguza mu lutikko ya St. Mary’s Cathedral e Lubaga.
Obubaka bwa Nnyinimu butambudde bwe buti mubujjuvu.
“Tubalamusizza mwenna, tuyozaayoza Ssaabasumba, omukulu wekifo bannaddiini n’abakulisitu mwenna okuweza emyaka 100 bukya Keleziya y’e Lubaga etandika omulimu gw’okuyigiriza abantu baffe eddiini, emirembe n’okwegatta.
Ebyafaayo biraga nti okuviira ddala ku Ssekabaka Muteesa I nti Keleziya n’Obwakabaka bwa Buganda bubaddewo mu ddembe, okukolera awamu era nga buli omu yebuuza ku munne olw’obulungi bw’abantu baffe. Enkolagana eno evuddemu ebibala bingi omuli abakulembeze abaweerezza obulungi Obwakabaka n’eggwanga lyaffe, twagala tukuume enkolagana eno.
Twenyumiriza nnyo mu ngeri Keleziya eno gyetuusizza obuweereza n’eddoboozi lya Kristu eri abantu baffe ng’eyita mu kuggulawo ebigo, amasomero, amalwaliro n’ebintu ebirala. Tukimanyi bulungi nti omulimu guno tegutuukikako awatali bukulembeze bulungi n’okwewayo kw’aba Kristu. N’olwekyo twebaza olw’okukubiriza abakrisitu okwongera okuwagira enteekateeka zino n’endala ezibangibwawo olw’okutumbula obulamu bw’omuntu wa bulijjo.
Ebiseera bingi tuwulidde Keleziya ng’evumirira embeera ezinyigiriza abantu omuli; okusosolwa olw’eddiini, eggwanga n’endowooza zaabwe mu by’obufuzi, obuvumu buno obw’okwogera amazima, okulwanirira eddembe, okwegatta n’okussa ekitiibwa mu ddembe ly’obuntu tusaba Eklezia ekwongere mu maaso.
Ffenna wamu tukubirize abantu baffe naddala abavubuka obutakyamizibwa buyinza wadde okugulibwa essente ng’eggwanga lyaffe liggwawo olwa bannabyabufuzi abekkusa bokka na bokka.
Ekiseera kituuse ffenna okugatta eddoboozi okusaba abatukulembera ne bannayuganda bonna okukubaganya ebirowoozo ku butali bumativu obuli mu kukulemberwa n’okugabana eby’obugagga by’ensi yaffe mu kyenkanyi nga tuyita mu kwekebejja constitution n’amateeka amalala agafuga eggwanga lyaffe, guno omulimu twagutandikako dda tubasaba twongere okugatta eddoboozi ery’awamu ku nsonga eno.
Tuddamu okubayozaayoza okutuuka ku lunaku luno era twebaza na bonna abayambye mu kuddaabiriza Eklezia eno, tusaba enkolagana ya Eklezia n’Obwakabaka bwa Buganda eyongere okunywezebwa”.
