Ekibiina kyebyobufuzi ki National unity Platform NUP kiwandiise ebbaluwa entongole eri omukago gwa IPOD, nga kisaba okukkirizibwa okwegatta ku mukago guno okufuuka ki memba n’okwetaba mu nteekateeka zonna ezikolebwa omukago guno.
Abakulira NUP baali bagaana okwegatta ku mukago gwa IPOD nga bagamba nti tegulina bigenderwa byassimba, okuggyako abagukukira okunywamu obunywi ka caayi n’okwekubya ebifaananyi.
Mu kusooka NUP yali esazeewo okufiirwa ensimbi government zeewa ebibiina byobufuzi naye nga teyeegase ku IPOD
Omwaka oguwedde 2025, parliament yakola ennongosereza mu tteeka erifuga ebibiina byobufuzi erya political parties and organizations Act, nekifuulibwa kyabuwaze ebibiina ebirina ababaka mu parliament okuweebwa ensimbi z’omuwi w’omusolo nti birina kubeera wansi womukago gwa IPOD, era nebissa omukono ku ndagaano y’omukago gwa IPOD.
NUP oluvanyuma lw’etteeka lino okuyisibwa nookutandiika okussibwa mu nkola,ensimbi obuwumbi 5 nobukadde 700 zeyali efuna buli mwaka zaayimirizibwa, wadde yalina ababaka 57 mu parliament eye 11, era omwaka gw’ebyensimbi 2025/2026 teyafuna nsimbi ezo.
Mu bbaluwa ewandiikiddwa ssabawandiisi wa NUP Lewis Rubongoya eri Ssenkulu w’omukago gwa IPOD Dr.Lawrence Sserwambala,NUP esabye ekkirizibwe okwegatta ku mukago gwa gwa IPOD.
NUP era eraze nti neteefuteefu okuteeka omukono ku ndagaano efuula ekibiina ki NUP memba omujjuvu owa IPOD.
Mu bbaluwa ssabawandiisi wa NUP Lewis Rubongoya gyeyawandiise ngennaku zomwezi 18 June,2026, NUP yeyamye okuteeka mu nkola nokugondera emiramwa, ebigendererwa by’omukago gwa IPOD, wamu nookugondera obukwakulizo bwendagaano y’omukago guno
Mu bbaluwa eyawandiikibwa Ssenkulu wa IPOD Dr.Lawrence Sserwambala wiiki emu eyise eri NUP, IPOD yabuulira NUP okutegeeza omukulembeze wabwe Robert Kyagulanyi Ssentamu okubeerawo ng’omukulembeze owokuntikko ow’ekibiina, nti kubanga yeyekka akkirizibwa okuteeka omukono ku ndagaano efuula ekibiina ki memba kya IPOD.
Lewis Rubongoya mu bbaluwa ye eri IPOD, agisabye ekkirize omukulembeze owekiseera owekibiina ki NUP Lina zedriga nti yaaba akiikirira Robert Kyagulanyi Ssentamu omukulembeze wa NUP owokuntikko, mu kuteeka omukono ku ndagaano egatta NUP ku IPOD
Rubongoya mu bbaluwa ye eno eri IPOD agambye nti omukulembeze wekibiina Robert Kyagulanyi Ssentamu akyali bweru waggwanga, kale nga watali obuyinza obuddukanya ekibiina yabuleka mu mikono gya Lina Zedriga, era nga mwetegefu okuteeka omukono ku ndagaano efuula NUP memba wa IPOD
Rubongoya ataddeko nebbaluwa endala eya Robert Kyagulanyi Ssentamu gyeyawandiise ng’ayongera Lina Zedriga obuyinza okubeera omukulembeze w’ekibiina ki NUP owekiseera, ebbanga eddala lya mwezi mulamba okutuusa nga 16 July,2026.
Okusinziira ku ndagaano yomukago gwa IPOD ,omukulembeze wekibiina owokuntikko yeyekka akkirizibwa okuteeka omukono ku ndagaano eno efuula ekibiina ki memba mu mukago, ng’ali wamu ne ssabawandiisi w’ekibiina.
Ba Ssaabawandiisi b’ebibiina ebiri mu IPOD okuyita mu kakiiko kabwe ka IPOD Council basuubirwa okutuula bekennneenye okusaba kwa NUP, basalewo ekiddako.
Ensisinkano yabakulembeze bebibiina byobufuzi ebirina obwa memba mu IPOd eya IPOD Summit , esuubirwa okubeerayo nga omwezi guno ogwa June,2026 tegunagwako, era eno yesuubirwa okuyitibwamu okuyingiza ebibiina okuli ANT ne NUP mu IPOD.
Abakulembeze ba IPOD summit,kuliko owa DP Nobert Mao Ono nga ye ssentebbe wa IPOD mu kiseera kino, Yoweri Kaguta Museveni ssentebbe wa NRM, Jimmy James Akena President wa UPC ne Eng Patrick Oboi Amuriat president wa FDC, nga kati basuubirwa okwegattibwako Maj General Gregory Mugisha Muntu president wa ANT ne Robert Kyagulanyi Ssentamu president wa NUP.#
