Ekitongole ekiddukanya ekibuga ky’eggwanga ekikulu ki Kampala Capital City Authority kitongozza kaweefube w’okulwanyisa n’okutangira obubenje bw’okunguudo mu Kampala, nga businga kucaaka ennyo mu mwezi gwa December ogulimu ebikujjuko by’ennaku enkulu eza ssekukkulu n’okumalako omwaka.
Aba KCCA mu kaweefube ono bategeezezza nti bagenda kukolagana n’aba Uganda Professional Drivers Network wamu n’emikutu gy’amawulire.
Ebibalo biraga nti mu mwaka 2024 mu December yekka, obubenje 2445 bwebwagwa ne mufiiramu banna Uganda n’okukosa abalala bangi.
Kaweefube ono agenderera kubangula bagoba babidduka obutavuga ndiima, nti kubanga evaamu omutawaana gw’okufiirwa abantu n’okuleka bangi n’ebisago.
Bwabadde atongoza kaweefube ono mu Kampala, Lord Mayor Ssaalongo Erias Lukwago asabye abagoba b’ebidduka bonna okwongera okubeera n’obuvunaanyizibwa ku luguudo naddala nga bataatira obulamu bwabanna Uganda.
Lukwago yeebazizza aba Uganda Professional Drivers Network olw’okubeegattako mu kaweefube ono agenderera okukuuma n’okutaasa bannakibuga obubenje.
Ssenkulu wa Uganda Professional Drivers Network Ndugu Omongo agambye nti kaweefube ono ajjidde mu kiseera ekituufu webalina okwongera amaanyi mu kubangula n’okusomesa abagoba b’ebidduka ku nvuga ey’obuvunaanyizibwa, nga babalirira obulamu bw’abalala.
Omukwanaganya w’enteekateeka eno eya KCCA Road Safety Project Jemima Nalumansi agambye nti omwezi guno gwonna ogwa December,2025 baakutambuza kaweefube ono mu bagoba b’ebidduka ng’emu ku nteekateeka gyebasuubira nti yakuyamba nnyo mu kukendeeza obubenje.
Ategeezezza nti essira bagenda kuliteeka ku kukendeeza endeema ku mulamwa ogugamba nti “Waliwo ensonga lwaki ebipimo by’endiima mwebiri mu bidduka byammwe”
Mu kibuga bagala abagoba b’ebidduka wakiri okuba nga tebasussa misiinde gisoba mu 30 buli ssaawa.
Bisakiddwa: Kamulegeya Achileo K
