Katikkiro wa Buganda Charles Peter Mayiga atenderezza Hellen Nakimuli olw’okuwagira enteekateeka z’Obwakabaka zonna ezikoleddwa mu bizinga, saako okubeera omubaka abadde ayagala ennyo omulimu gwe, ate ng’ayagala n’abantu abaamulonda.
Katikkiro abadde mu Maka ga bakadde ba Nakimuli agasangibwa e Namungoona.
Katikkiro agambye nti Nakimuli abadde ayagala omulimu gwe ate ng’agukola n’obunyiikivu, ng’awagira emipiira gy’amasaza, awamu ne kaweefube w’okulwanyisa siriimu mu bizinga n’ebirala.
Katikkiro Mayiga era asaasidde Taata w’omugenzi Fr. Christopher Walusimbi nga yaliko Kweba omwami owa Kabaka akulembera Ssese, era asaasidde muwala w’omugenzi, bakulembeze banne, bannabizinga ab’e Ssese n’eggwanga lyonna okutwaliza awamu.
Mu maka ga bakadde be,wategekeddwawo okusaba okwokwebaza Katonda olw’obulamu bw’Abadde Omubaka nga kukulembeddwamu Omulabirizi wa Orthodox e Jinja, bishop Silvestros Kisitu.
Omubaka Helen Nakimuli yavudde mu bulamu bw’ensi ku Sunday nga 19 April,2026 mu ddwaliro lya Alexandra Medical Centre mu Kampala, gyeyabadde agenze okumulongoosa mu lubuto, teyasobodde kudda ngulu.
Omulambo gwa Nakimuli gwasooseddwa mu parliament nesiima emirimu gye, oluvannyuma naatwalibwa ku kitebe ky’Ekibiina ki National Unity Platform e Makerere Kavule, nga eno bannakibiina gyebasinzidde neboogera ku birungi byaakoledde eggwanga, naddala ekitundu kyabadde akiikirira ekye Kalangala.
Bisakiddwa: Kato Denis
