Obwakabaka bwa Buganda busabye government ya Uganda ekolagane ne ginaayo eya Tanzania, okumalawo ekizibu ky’Ettemu erikolebwa ku bannauganda abavubira ku Nnyanja Nalubaale.
Abavubi ku mwalo gwe Kasensero bategeezezza Katikkiro wa Buganda, nti ettemu erikolebwa ku bavubi ku nnyanja naddala mu bitundu Uganda weyawulira ne Tanzania libatadde ku bunkenke.
Katikkiro wa Buganda Charles Peter Mayiga abadde alambula abantu ba Kabaka mu Ssaza Buddu, ng’asinziira ku mwalo e Kasensero, kwekusaba govermment ya Uganda nti wabeewo okunoonyereza okwa mangu ku mbeera y’obubbi n’ettemu erikolebwa ku Banna Uganda abavubira ku Nnyanja Nnalubaale.
Katikkiro era asabye abavubi okwewala Mukenenya nga beewala okunywa omwenge ogw’eggyenjeero, naabawa amagezi nti amasanyu ag’eddakiika entono ezitaliiko kwekuuma galeme kubakwasa Siriimu, waakiri bakozese ebimutangira.
Akola nga Ssentebe w’Omwalo gwe Kasensero, Omulangira Joseph Ssuuna Kateregga agambye nti Okuttibwa kw’abavubi ba Uganda n’okubbibwa kw’amaato ne Engine zaago kuzzizza nnyo abantu ba Kabaka emabega.
Buli mwaka Engine z’amaato 100 n’Omusobyo zibbibwa nga kigambibwa nti zisibira mu Tanzania.
Omulangira Joseph Ssuuna Kateregga, yebazizza Obwakabaka bwa Buganda olwokukwatira abaana babwe, nga babawa basale z’okusoma.
Okubunyisa enkola ya Situla Omutindo
Mu kulambula kwa Katikkiro, asisinkanye abalimi, abali mu bibiina by’obwegassi, abasuubuzi n’abantu ba Kabaka abakola emirimu egy’enjawulo, naabakubiriza okusitula omutindo mu buli kyebakola.
Katikkiro alambudde Hajj Yasin Sserwadda omulimi w’emmwanyi eziweza yiika 15 e Kasensero.
Amwebazizza okulima emmwanyi nga agoberera enteekateeka ya Situla Omutindo, era esikiriza abalala okujjumbira okulima emmwanyi.
Abagambye nti balina okutandika n’okusitula omutindo gw’obulamu bwabwe nga bekuuma endwadde ezeewalika.
Minister w’eby’Obulamu, Ebyenjigiriza ne wofiisi ya Nnaabagereka Owek. Chotilda Nakate Kikomeko ajjukizza abavubi okwewala okukwatibwa siriimu olw’obulagajjavu.
Omwami wa Kabaka amukulembererako essaza Buddu Pookino Jude Muleke,asinzidde mu Nsisinkano ne Banna CBS pewosa aba Kigasa Akirimu Group CBS PEWOSA ku Mbuga y’Egombolola ya Mutuba IV Kyebe Kannabulemu, nayeebaza Ssaabasajja olw’Okwolesebwa nabbulula Obwegassi.
Mungeri eyenjawulo Owek. Bbaale Mugera agambye nti okuvuganya okuli mu banna PEWOSA mu Buddu,kwongedde enkulaakulana,nga Abantu b’Omuteregga beewola nebasiga ensimbi ate nebasasula.
Katikkiro mu lugendo lwe luno awerekeddwako minister w’Olukiiko, cabinet n’ensonga ez’enkizo mu wofiisi ya Kamalabyonna Owek Noah Kiyimba, Minister w’Amawulire,Okukunga abantu era omwogezi w’Obwakabaka Owek Isreal Kazibwe Kitooke, ssentebe wa Boodi ya Bucadef Omuk Dr Ben Ssekamatte, ssenkulu wa Bucadef Omuk Alfred Batuusa nabalala bangi.
Bisakiddwa: Kato Denis
