Katikkiro wa Buganda Charles Peter Mayiga ayanjudde embeera nga bweyimiridde mu Bwakabaka bwa Buganda, nga yesigamye ku nteekateeka ya ‘Situla Omutindo’ ezimbiddwa ku mising 6.
Katikkiro ayanjulidde olukiiko nti Nnyininsi Sseggwanga Musota Ssaabasajja Kabaka Ronald Muwenda Mutebi II gyali alamula Obuganda, era ng’Obuganda bwajaguzza amazaalibwa ge ag’emyaka 71.
Agambye nti okuva nga 3 May, 2025, Omuteregga alabiseeko eri Obuganda ku mikolo emitongole emirundi 3, omuli Okuggalawo empaka z’omupiira gw’amasaza nga 1 November, 2025, mu Nkuuka ya CBS nga 31 December, okuokuggalawo 2025 n’okuggulawo omwaka 2026, saako okuwuubira abaddusi ku misinde gy’amazaalibwa ga Kabaka age 71, nga 12 April, 2026 mu lubiri e Mmengo.
Emiramwa 6 egya Situla omutindo kuliko eby’obulimi, eby’eobulamu, ebyenjigiriza,obukulembeze, amaka,n’ebyobusuubuzi.
Eby’obulamu:
Katikkiro akubirizza abantu okufaayo eri obulamu bwabwe kinnoomu, nga balya emmere ey’ekigero, erimu ebiriisa, ate n’okukola dduyiro.
Radio CBS Fm eri ku mulimu gw’okusonda ensimbi okuzimba ekifo awajjanjabirwa abagudde ku bubenje mu ddwaliro e Nkozi ku luduudo oluva e Kampala okudda e Masaka.
Katikkiro agambye nti Omwaka oguwedde 2025 ensimbi obukadde 435 ezaava mu kyeggulo kya Kaliisoliiso, zezaaweebwayo mu nkolagana ya bannamikago aba Rotary, Centenary bank ne MTN Uganda.
Waliwo enteekateeka egenda mu maaso Obwakabaka okufuna eddwaliro eriseeyeeya ku mazzi olwo abantu ku bizinga bafune obujjanjabi obwetaagisa. Enteekateeka eno ewomeddwamu omutwe aba Rotary mu Nothern Califonia.
Ensiisira z’ebyobulamu zikoleddwa ekitongole kya Kabaka Foundation era zakugenda mu maaso, okuziimba amalwaliro mu masaza, n’okulwanyisa obulwadde bwa mukenenya.
Ebyenjigiriza;
Obwakabaka bwatandise amasomero ga Nursery ag’abaana abato agawera 20 mu Masaza ga Buganda.
Katikkiro agambye nti enteekateeka eno yatuukibwako oluvannyuma lwa alipoota ezaafuluma eziraga nti Uganda yesiinga amasomero amatono ag’abaana abato abaakatandika okusoma, bwogerageranya n’amawanga amalala okul Tanzania, Kenya ne Rwanda.
Ettendekero lya Buganda ery’ebyemikono erya Kasawo Institute lussiddwako essira lituuke ku ssa eriweesa Kabaka ekitiibwa.
Muteesa 1 Royal University yafuna charter era embeera y’ebyenjigiriza yeyongedde okutereera. Muteesa I era yawangudde n’ekikopo ky’omupiira ogwa zi University mu Uganda.
Obukulembeze obuluηamu;
Buli mukulembeze alina okumanya emirimu gye, bwoba tosobola kwekubiriza ng’omukulembeze obeera tosaanidde kubeera mu kifo ekyo. Abakulembeze balina okubeera mu makakkalabizo, okwewala okwekwasa obusongasonga kuba tekiriimu makulu, kisobole okuwa abakulemberwa eky’okulabirako ekituufu.
Amaka;
Amaka mu Buganda galina okuteekebwateekebwa mu ngeri ey’omutindo, nga gabeera ne kabuyonjo, akatandaalo, emmere ey’okulya n’okutundako, abaana okubeera n’ebyokwambala engoye n’engatto, okulembeka amazzi, okugoba ebisooto mu luggya nga mussibwamu obuggyo n’ebirala.
Eby’obulimi;
Katikkiro agambye nti enkola ya mmwanyi terimba evuddemu ebibala bingi, ekyeyolekedde mu byalo ebyanjawulo byalambudde, abantu gyebajjumbidde okulima emmwanyi okusitula embeera y’obulamu bwabwe.
Awadde ey’okulabirako eky’ekitundu kye Kasensero mu Buddu, gy’abadde yakalambula embeera gyeyasanzeeyo nga yeyagaza, abantu batandise okuzimba ennyumba ez’omuziinzi okuva mu mmwanyi, abaana basoma, balina amasannyalaze g’amaanyi g’enjuba, abaana bambala engatto n’ebirala.
Eby’obusuubuzi;
Katikkiro agambye nti Obwakabaka bwatondawo ekitongole kya Buganda Chamber of Commerce nekigendererwa eky’okuyambako abasuubuzi okusitula omutindo mu busuubuzi, okutunda eby’amaguzi ebweru wa Uganda, n’okutandikawo amakolero.
Mu ngeri yeemu Katikkiro ayogedde ku nsonga endala ezigenda mu maaso mu ggwanga:
Abaana 4 abaatemulwa e Ggaba;
Katikkiro asaasidde abazadde b’abaana abaatemulwa ku kifo ekirabirira abaana ekya Ggaba Early Childhood Development Centre, omutemu Christopher Okello Onyum mweyasanjagira abaana 4 abali wakati w’omwak 1 ne 3.
Ettemu lyaliwo nga 02 April,2026.
Onyum yakwatibwa era naatandika okuwerennemba n’emisango okumala ennaku 28 nga kooti etuula e Ggaba gyeyaddiza emisango.
Kooti yamusingisa omusango, era nga 30 April,2026 yamusalira ekibonerezo kyakufa.
Katikkiro agambye nti omusango guno gwalimu eky’okuyiga, nti emisango gyisaanye giwozesebwe mu budde, okutebenkeza emitima gy’abantu, n’okuziyiza okutwalira amateeka mu ngalo.
Akalulu ka bonna 2026;
Katikkiro agambye nti wadde okulonda abakulembeze okwaliwo nga 15 January,2026 n’ennaku endala ezaddirira nti wadde kwali kutambudde bulungi, naye waliwo ebitaagenda bulungi.
Agambye nti okulonda kwasaasanirwa obunkenke, ssaako emmotoka ennwanyi eza mmamba ezaayibwa mu bitundu ebyenjawulo nga zibeera zetala buli wamu awamu n’amagye , obutambi obwayitiηana nga bulaga nti okulonda kwalimu okucanga obululu ekyatuusa n’okulangirira ku buwanguzi ate abataawangula.
Mu mbeera yeemu ayogedde ku mbeera y’abebyokwerinda okukuba abantu embooko, awatali kutaliza Bannamawulire, okugaana abesimbyewo okukuba enkuηaana ezisaba akalulu n’ebirala.
Wabula agamba nti eky’okulonda nga bwe byaggwa obunkenke busaana okumalibwawo mu bantu, abaakwatibwa nebasimbibwa mu makomera basaana bayimbulwe, abalala batwalibwe mu kkooti bawozesebwe.
Katikkiro agambye nti awatali butebenkevu bwa namaddala tewaba nkulaakulana, kubanga buli omu abeera yekengera munne.
Sovereignty bill
Katikkiro wa Buganda akkaatirizza nti Obwakabaka bwa Buganda bwawaddeyo ekiwandiiko kya miko mukaaga nga kirimu ensonga 9, kyakwasiddwa Ssaabawolereza wa government eyawakati nga kirambika Buganda weyimiridde ku bbago lino.
“Ebbago eryo bweriyisibwa nga bweriri, lijja kulemesa enteekateeka z’Obbwakabaka nnyingi omuli; Oluwalo, Obuvujjirizi obuva ebweru , okusima enzizi mu Buganda, n’okutulemesa okwogera ku ebyo government byeba ereese ‘ Policy’, Kale tusaba baleme kuliyisa”
Omusolo
Katikkiro agambye nti shs 200 ebyayongeddwa ku musolo gw’amafuta gwakukosa ffenna bannauganda, kubanga ebisale by’ebintu ebikozesebwa mu bulamu obwa bulijjo bijja kulinnya, bwatyo n’asaba government okulaba ng’emisolo egikuηaanyizibwa gikola ebyo ebirabwako, olwo abantu bajja kuwa omusolo nga beeyagalidde.
Okusenda abantu ku nguudo;
Katikkiro agambye nti ebibuga kirungi okubitereeza, kyokka ba mufuna mpola basaana okufunirwa ebifo webasaana okukolera, nga biteekeddwateekeddwa bulungi.
Agambye nti kikyamu okulinda abantu nebamala okuzimba ubuyumba bwabwe mwebakolera ate nebusaanyizibwawo.
Anokoddeyo abatunda eby’okulya, n’agamba nti ebifo byabwe ssinga biteekebwateekebwa bulungi biyinza okusikiriza abalambuzi olwo eggwanga ne lifunamu ensimbi, nabo abasuubuzi nebafunamu ekiwera okwekulaakulanya.
