Katikkiro wa Buganda Charles Peter Mayiga, atenderezza emirimu gyabadde Namasole Margaret Nagawa Ssiwoza, gwayogeddeko nti abadde mukozi, mwesimbu ate ng’ayagaliza buli muntu.
Katikkiro asinzidde mu maka g’omugenzi agasangibwa ku kyalo Upper Mawanga e Buziga mu ggombolola ye Makindye mu Kampala.
Katikkiro alagidde aba famire nga bakulembeddwamu Dr Daniel Muyanja nga ye mutabani w’omugenzi okuwandiika ekitabo ekiraga ebyafaayo by’omugenzi kisobozese okukuuma ebimu ku bimukwatako ebirisomwako abaliddawo.
Katikkiro Mayiga era agumizza abenju y’omugenzi olwokufiirwa maama, era n’abategeeza nti Obwakabaka bwakutambulira wamu nabo.
Ssabaganzi Emmanuel Ssekitooleko, naye asinzidde mu maka g’omugenzi naakakasa nti Namasole abadde ayagala nnyo okukungaana n’abantu newankubade ng’embeera oluusi temusobozesa, neyebaza Obwakabaka olw’okujanjaba mwannyina.
Omugenzi Namasole Margaret Ssiwoza Nagawa Mayanja, y’atandika obuwereza bwe mu mwaka gwa 2013 oluvanyuma lwa Namasole Rebecca Zirimbuga okuseerera.
Namasole Zirimbuga yeyasikira Namasole Sarah Nalule Kisosonkole eyazaala Ssabasajja Kabaka Ronald Muwenda Mutebi II.
Namasole Margaret Siwoza agenda kuziikibwa olunaku lw’enkya ku bbalaza nga 6.12.2021 e Kyaliwajjala, wabula nga wakusookawo okusaba okwenjawulo mu lutikko y’omutukuvu Paul e Namirembe.
