Katikkiro Charles Peter Mayiga awabudde abavubuka abaayingira eby’obufuzi obutalowooza nti eby’obubufuzi kazannyo buzannyo, wabula okubeera n’ekiruubirirwa eky’okuba abakulembeze abalumirirwa abalala.
Okwogera bwati Kamalabyonna abadde asisinkanye abavubuka okuva mu kibiina kya People’s Front for Freedom abakiise embuga.
“Bwemuba mwesowoddeyo nga munoonya kwogerwako, temujja kutugasa” – Katikkiro Mayiga
Abawabudde obutabuukira binene mu budde obumpi, wabula buli kintu bakikolere mu budde bwakyo nga bwebalinnya amadaala.
Abasabye okwagala ennyo ebyabwe naddala Kabaka waabwe olwo bagatteko ebirala naye nga Kabaka gwebasoosowaza.
Abawabudde obutatya bisoomooza kubanga mu bukulembeze ebyo biteekeddwa okubaamu wabula nti omukulembeze ateekeddwa okutema empenda ez’okubivvuunuka.
Minisita w’Abavubuka Eby’emizannyo n’Ebitone, Owek. Robert Sserwanga agambye nti kyandibadde kikakata ku buli muvubuka okwenyigira mu kulonda abakulembeze mu kulonda okujja 2026 kubanga kibalengeza gyebaba balaga.
Owek. Sserwanga abasabye okukwata empola ensonga z’ebyobufuzi era banoonye okusooka okubangulwa mu by’obukulembeze lwebanaagasa eggwanga.
Akulira abavubuka mu PFF era akulembeddemu ekibinja ekikiise embuga, Muzzukulu wa Kabazzi Buyondo Henry Patrick agambye nti ng’abavubuka, baakizuula nga bateekkeddwa okwenyigira obutereevu mu nsonga z’okutereeza eby’obukulembeze bw’eggwanga nga batandika nga bavubuka.
Buyondo yeebazizza Katikkiro olw’okubuulirira kwabawa bulijjo ng’abavubuka bwatyo ku lwa banne neyeeyama okutambulira ku buwabuzi bwe.
Baleetedde Katikkiro amantambuntambuu ng’ekifaananyi ky’omuziro gwe “Omutima” ne kkopi ya Ssemateeka w’Ekibiina kyabwe ekya PFF.
Bisakiddwa: Kamulegeya Achileo K
