Ab’ebyokwerinda okuli police n’amagye batudde mu kafubo ak’enjawulo okutema empenda ku ngeri gyebanalambikamu abantu abagenda okwetaba mu misinde gy’amazaalibwa ga Ssabasajja Kabaka age 68.
Emisinde gy’amazaalibwa ga Ssaabasajja gyakuddukibwa nga 16 omwezi guno ogwa April 2023, era Omutanda yasiima okuwuubira abaddusi mu lubiri e Mengo ku ssaawa 12 ez’okumakya.
Mu lukiiko luno olubadde mu Lubiri e Mengo, ab’ebyokwerinda balabudde abalina ekirowoozo ky’okutaataaganya enteekateena eno ku olwo beesonyiwe okujja mu kibuga kubanga abeebyokwerinda babeetegekedde bulungi okubanganga.
Mu lukiiko luno olubadde mu Lubiri e Mengo, omumyuka w’omwogezi wa police Luke Oweyesigire alabudde abazadde obutaleeta baana bato mu misinde gino nti kubanga kissa ebulamu bwabwe n’ebyokwerinda byabwe mu katyabaga.
Omumyuka wa RCC w’e Lubaga Herbert Anderson Burora, asuubizza nti enteekateeka zonna zijja kubeera nnungi ssinga abanajja bagoberera ebiragiro by’abebyokwerinda.
Olukiiko luno lwetabyemu abaduumizi b’ebitongole bya police byonna mu Kampala okuli aba Traffic, aba Ambulance, police enzinnya mooto n’ebirala.
Buli mwaka Obuganda bwetaba mu misinde gy’amazaalibwa ga Kabaka gyeyasiima gibeere n’ekigendererwa kyokulwanyisa endwadde enzenjawulo, nga ku mulundi guno emisinde gisimbye ku mulamwa gw’okulwanyisa obulwadde bwa mukenenya ng’abaami be basaale mu kulwanyisa obulwadde buno nga bataasa omwana omuwala.
Abaddusi basasula shs 20,000 okwegulira akajoozi kaanaddukiramu mu bifo ebyenjawulo.
Bisakiddwa: Kamulegeya Achileo K.